«Astana – meıirimdi qala» jobasy aıasynda 1402 jan tegin tasymaldandy (FOTO)

11 февраль 2019 258 0
Оqý rejımi

Apta boıy Astana jurtshylyǵyn ábigerge salyp, ábden mazasyn alǵan aıazdyń beti qaıtyp, aqtútek borannyń ashýy tarqaǵandaı. Birneshe kún boıy qaharyna mingen qatal qystyń qyspaǵy qala jurtshylyǵynyń berekesin alyp, birqatar mekemelerdiń jumysyn májbúrli toqtatyp tastady. Aqyrǵan aıazda qoǵamdyq kólik kútip, úsik shalǵandardyń qatary kóbeıe túskeni taǵy bar. Qoǵamdyq densaýlyq saqtaý basqarmasynyń 6-aqpan kúngi habarlamasynda 14 jannyń úsik shalyp, aýrýhanaǵa jetkizilgeni aıtylǵan.

Osy bir aıazdy kúnderi QMDB Astana qalasy ókildiginiń uıymdastyrýymen «Astana – meıirimdi qala» jobasy iske qosylyp, qanshama jan júrek jylýymen bólisip, sýyq kúnderde bir-birine sep bolýǵa sebepkerlik jasaǵany barshańyzǵa málim. QMDB tóraǵasynyń birinshi orynbasary, Astana qalasynyń bas ımamy Naýryzbaı qajy Taǵanulynyń tapsyrmasy negizinde bul kúnderi Elordamyzdaǵy 10 meshitte tegin taksı qyzmeti paıda bolyp, jolaýshylardy úılerine tegin jetkizýmen aınalysty. Sondaı-aq, aıazdy kúnderi Astana kóshelerindegi jumysyn toqtatpaǵan tazalyqshylar qaýymyna arnaıy ystyq tamaq taratylyp, qyzmetterine qolǵabys jasalyp keldi.

Osy oraıda, ótken aptada ishinde Astana meshitteriniń qyzmetkerleri men erikti jamaǵatty jumyldyrý jumystary kezinde jalpy sany 202 kólik tegin jetkizip salý jumystaryn jandandyryp, qala boıynsha 1402 jan der kezinde dittegen jerlerine jetken.

Budan bólek, Elordamyzdaǵy 10 meshit qyzmetkerleriniń uıymdastyrýymen apta boıy kóshe tazalyqshylaryna arnap birneshe márte ystyq tamaq taratý jumystaryn júrgizilip, 560 qyzmetker qamtylǵan.

Meıirimdilikti tý etken meshit qyzmetkerleri tegin taksı qyzmeti men ystyq tamaq taratý jumystarymen shektelip qana qoımaı, aıazdy kúnderi muqtaj otbasylarǵa kómir túsirip, turmysy tómen januıalarǵa azyq-túlik qoryn jetkizip berip, alǵystaryna bólendi.

Alla Taǵala qıyn-qystaý kúnderi bir-birimizge baýyrmal bolyp, birligi men yntymaǵy jarasqan qalpymyzdan aıyrmasyn!

Sýretterdi «FOTOGALEREIa» aıdarynan kóre alasyzdar!

 

Pіkіrler Kіrý