ASTANA ÓKILDIGINIŃ QYZMETKERI «ÚZDIK OŃALTÝShY» NOMINATsIIaSYNA IE BOLDY (FOTO)
Qazaqstan musylmandary dinı basqarmasynyń qorytyndy Tóralqa májilisi barysynda «Múftııat úzdigi – 2025» nomınatsııasymen marapattaý rásimi ótti. Saltanatty sharaǵa Bas múftı Naýryzbaı qajy Taǵanuly arnaıy qatysyp, nomınatsııa ıegerlerin marapattady.
QMDB Dinı ońaltý bóliminiń Astana qalasy ókildigi boıynsha jaýapty mamany Qabdysalym Raqymqazy «Úzdik ońaltýshy» nomınatsııasyna ıe boldy.
Bas múftı saltanatty jıynda: «Búgingi mereıtoı – Dinı basqarmanyń ǵana emes, kúlli musylman jamaǵatynyń ortaq qýanyshy. Bul – ımandylyqtyń, izgiliktiń, el birliginiń merekesi. Alla Taǵala osy qara shańyraqtyń irgesin berik, órisin keń etsin! Barsha din qyzmetkerlerine, osy jolda eńbek etip júrgen áriptesterge Alla razy bolsyn! Búgin «Múftııat úzdigi» atanyp jatqan barsha baýyrlarymdy, áriptesterimdi shyn júrekten quttyqtaımyn. Bul – jyldar boıy jasaǵan jumystaryńyzdyń jemisi dep sanaımyn. Eń bastysy Allanyń marapatyna ıe bolýdy jazǵaı. Elimiz aman, jurtymyz tynysh, Táýelsizdigimiz tuǵyrly bolǵaı! Alla Taǵala Dinı basqarmanyń qyzmetine bereke berip, halqymyzdyń rýhanı damýyna mol ıgilik násip etsin! Áýmın!», - dep atap ótti.
