ASTANA QALALYQ «ÁLJAN ANA» MEShITINE BAS IMAM TAǴAIYNDALDY (FOTO)

Búgin Qasıetti jumada Bas múftı Naýryzbaı qajy Taǵanuly hazirettiń buıryǵymen Muratbek Muhtarhanuly Qystaýbaev Qazaqstan musylmandary dinı basqarmasynyń fılıaly Astana qalalyq «Áljan ana» meshitiniń bas ımamy bolyp taǵaıyndaldy.

«Áljan ana» meshitinde Astana qalasynyń bas ımamy Erbolat Nuryldauly juma namazyn júrgizip, meshit ujymy men jamaǵatyna jańa bas ımamdy tanystyrdy.

«Muratbek Muhtarhanuly áıgili «Ál-Azhar» ýnıversıtetin támamdaǵan, dinı bilimi joǵary. 2013 jyldan bastap Oral ortalyq meshitiniń naıb ımamy, Oral medresesiniń dırektorynyń orynbasary qyzmetin atqardy. Endigi kezekte Astana qalasynyń rýhanı ómirine qaltyqsyz qyzmet etip, bar biliktiligi men bilimin, ynta-jigerin osy óńirdiń dinı turaqtylyǵyn nyǵaıtýǵa jumsaıdy dep senemin», - dedi Erbolat Nuryldauly.

Muratbek Muhtarhanuly Qystaýbaev – 1983 jyly dúnıege kelgen.

2000-2005 jyldary Q.A.Iassaýı atyndaǵy gýmanıtarlyq ınstıtýty «Dintaný» fakýltetin; 2005-2013 jyldary Egıpet Arab Respýblıkasy Ál-Azhar halyqaralyq ıslam ýnıversıteti «Sharıǵat» fakýltetin támámdaǵan.

2013 jyldan bastap «Oral» oblystyq ortalyq meshitiniń naıb ımamy,

2015-2018 jyldary «Oral» medresesi dırektorynyń oqý-isi jónindegi orynbasary qyzmetin atqarǵan.

2019 jyldyń 5 shildesinen bastap QMDB-nyń Batys Qazaqstan oblysy boıynsha ókili, BQO ortalyq meshitiniń bas ımamy qyzmetin atqarǵan.

2022 jyldyń jeltoqsan aıynan búgingi kúnge sheıin Astana qalasy ókildigi «Áziret Sultan» meshitiniń naıb ımamy qyzmetin atqaryp keldi.