ASTANA QALASYNDA RÝHANI MÁÝLIT KEShI ÓTTI (FOTO)

Qazaqstan musylmandary dinı basqarmasy Astana qalasy ókildiginiń uıymdastyrýymen elordadaǵy beıbitshilik jáne kelisim saraıynda «Izgilik jarshysy áz Muhammed (ﷺ)» atty rýhanı máýlit keshi bolyp ótti.

Is-sharaǵa QMDB tóraǵasy, Bas múftı Naýryzbaı qajy Taǵanuly, memleket jáne qoǵam qaıratkerleri, musylman memleketteriniń mártebeli elshileri, elorda turǵyndary men Astana qalasynyń bas ımamy Erbolat Júsipov bastaǵan din qyzmetkerleri qatysty.

«Bıylǵy «Islam jáne otbasy qundylyǵy» jylyna oraı respýblıka boıynsha QMDB meshitterinde otbasy qundylyǵyna basymdyq berip kelemiz. Qulshylyq úılerinde «Otbasylyq keńes berý ortalyqtary» ashylyp, sol arqyly elimiz boıynsha 500 otbasy jarastyryldy. Bul bárimiz úshin úlken jetistik. Endeshe búgingi máýlit merekesi de otbasy taqyrybyna arnalady», dep atap ótti, QMDB tóraǵasy Naýryzbaı qajy Taǵanuly.

Jıynda Meıirim paıǵambaryna (ﷺ) salaýattar aıtylyp, Máýlit jyry oqyldy. Sondaı-aq, QR-nyń Eńbek sińirgen qaıratker ártisteri dástúrli ánderdi oryndap, tájirıbeli teatr akterlary tarapynan otbasylyq ómirge qatysty mán-maǵynaǵa toly kórinister sahanalandy.

Rýhanı kesh aıasynda «Muftiyat» baspasynan jaryq kórgen «Hazireti Ábý Bákir Syddyq», «Quran injýleri», «Islam Entsıklopedııasy» (I–II tom), «Taýhıd», «Pátýalar jınaǵy» (I–V tom), «Paıǵambar otbasyndaǵy minsiz mámile» kitaptarynyń tusaýkeser rásimi ótti.

«Máýlit syıy» aıdary aıasynda «Jumysshy mamandyqtar jylyna» oraı ártúrli salada eńbek etip júrgen mamandar marapattaldy. Olar eldiń bilimi, mádenıeti, densaýlyǵy, qaýipsizdigi jáne áleýmettik ál-aýqaty úshin aıanbaı eńbek etip júrgen jandar. Olardyń arasynda mýzeı men kitaphana qyzmetkerleri, medıtsına salasynyń mamandary, muǵalimder, órt sóndirýshiler, HQK ortalyǵy men otbasylyq keńes berý ortalyǵynyń qyzmetkerleri bar.

Marapattaý munymen aıaqtalǵan joq. QMDB-nyń tól basylymdary – «Iman» jýrnaly men «Munara» gazeti jyl saıyn oqyrmandar arasynda shyǵarmashylyq baıqaý ótkizedi. Bıyl Abaı Qunanbaıulynyń 180 jyldyǵyna, Alash qozǵalysynyń 120 jyldyǵyna jáne QMDB-nyń 35 jyldyǵyna oraı «Abaı. Alash. Asyl din» atty baıqaý jarııalanyp, tamyz aıyna deıin elimizdiń ár óńirinen 90-nan asa shyǵarma qabyldanǵan bolatyn. Sol boıynsha jeńimpazdar anyqtalyp, aqyndar Bas múftı tarapynan marapattaldy: 1-oryn (Umra qajylyǵy): Ótesh Qyrǵyzbaev (Almaty qalasy); 2-oryn (300 myń teńge): Asan Omarov (Semeı qalasy); 3-oryn (200 myń teńge): Danııar Ihsan (Astana qalasy). Budan bólek bes yntalandyrý syılyǵy (100 myń teńgeden) men eki arnaýly syılyq (100 myń teńgeden) berildi.

Kesh sońynda jerebe tartý ádisi arqyly kórermender arasynda Umra qajylyǵyna joldama oınatylyp, elordalyq Bıbigúl esimdi aq jaýlyqty anamyzǵa kishi qajylyqqa joldama násip boldy. Osylaısha, jınalǵan jurtshylyq Máýlit keshinen zor rýhanı áser alyp qaıtty.

Источник: Aidos