Astana qalasynyń bas ımamy «Ál-Ǵanı» meshitine bardy

Astana qalasynyń bas ımamy Erbolat Júsipov bastaǵan bir top qyzmetkerler baqylaý-basqarý baǵyty aıasynda elordada tórindegi «Ál-Ǵanı» meshitine at basyn burdy.

Qulshylyq ordasynda qonaqtardy meshittiń bas ımamy Beıbit Myrzageldıev qarsy alyp, meshit qyzmetiniń qazirgi ahýaly, jamaǵatpen júrgizilip jatqan rýhanı-aǵartýshylyq sharalar men áleýmettik jobalar jóninde keńinen baıandady. Sonymen qatar, Beıbit Álipbekuly jamaǵatqa ár jeti kún saıyn taqyryptyq apta ýaǵyzdary uıymdastyrylyp jatqanyn aıtyp ótti.

Kezdesý barysynda din qyzmetkerlerimen arnaıy basqosý ótip, ózekti máseleler talqylandy. Bas ımam Erbolat Júsipov meshit jumystarynyń júıeli ári sapaly júrgizilýiniń mańyzdylyǵyna toqtalyp, dinı-aǵartýshylyq baǵyttaǵy qyzmetti kúsheıtý, jamaǵatpen baılanysty nyǵaıtý jáne tárbıe jumystaryn jetildirý boıynsha naqty tapsyrmalar berdi.

Sondaı-aq, jıyn barysynda ımamdardyń jaýapkershiligi, halyqpen tyǵyz baılanys ornatý, jastarmen jumys jáne qoǵamdaǵy rýhanı qundylyqtardy dáripteý máseleleri keńinen sóz boldy. Qala bas ımamy meshittiń tek qulshylyq orny ǵana emes, sonymen qatar tárbıelik, birlik pen izgiliktiń ordasy ekenin atap ótti.

Sapar aıasynda bas ımam jamaǵatpen de júzdesip, besin namazynan keıin ýaǵyz-nasıhat aıtyp, ımandylyq, birlik jáne izgilik taqyryptarynda taǵylymdy oılarymen bólisti.

Is-sapar sońynda meshit ujymyna aldaǵy jumystarǵa sáttilik tilep, el ıgiligi jolyndaǵy qyzmetterine tabys tiledi.

Источник: Aisha