ASTANA QALASYNYŃ BAS IMAMY «AQ MEShITTE» ÓTKEN MÁÝLIT KEShINE QATYSTY

Adam balasynyń boıyndaǵy izgi qasıettiń biri – adaldyq. Al adaldyqty ǵumyr jolynyń ózegine aınaldyrǵan Paıǵambarymyzdyń (Oǵan Allanyń salaýaty men sálemi bolsyn) ónegesi – musylman úshin qashanda temirqazyq. Osyny arqaý etken «Aq meshit» meshitinde «Adaldyq – Paıǵambar ósıeti» atty rýhanı Máýlit keshi ótti.

Rýhanı basqosýda Astana qalasynyń bas ımamy Nurbek qajy Áýeshanuly jamaǵatty qasıetti Máýlit aıymen quttyqtap, Paıǵambarymyzdyń (Oǵan Allanyń salaýaty men sálemi bolsyn) kórkem minezi men ónegeli ómiri jaıynda taǵylymdy nasıhat aıtty.

Halqymyz «Jaqsynyń aty ólmeıdi, ǵalymnyń haty ólmeıdi» degen. Paıǵambarymyzdyń ǵıbratty ǵumyry men asyl ósıeti de urpaqtan-urpaqqa jalǵasyp kele jatqan rýhanı mura. Bas ımam óz sózinde osy ónegeni kúndelikti ómirde ustanýdyń mańyzyna toqtaldy.

«Paıǵambarymyzdy jaqsy kórý – tek esimin ataýmen shektelmeıdi. Ony jaqsy kórý – onyń minezin, ádebin, sabyryn, keshirimin, adamdarǵa degen meıirimin óz ómirimizge engizý», – dedi Nurbek qajy Áýeshanuly.

Keshtiń shyraıyn kirgizgen rýhanı sátterdiń biri – Paıǵambarymyzdyń ómiri men ónegesin dáripteıtin Máýlit jyrynyń oqylýy boldy. «Áziret Sultan» meshitiniń naıb ımamy Jumanazar Óserhanuly Máýlit jyryn oqyp, jamaǵatqa rýhanı áser syılady. Sonymen qatar jamaǵatpen eki dúnıe sardaryna salaýattar aıtylyp, duǵa-tilekter jasaldy.

Sýretterdi «FOTOGALEREIa» aıdarynan kóre alasyz!

Источник: Aisha