ASTANA QALASYNYŃ BAS IMAMY «S. ǴYLMANI» MEShITINDE JUMA NAMAZYN ÓTKIZDI
Búgin Astana qalasynyń bas ımamy Nurbek qajy Áýeshanuly elordadaǵy «Sádýaqas qajy Ǵylmanı» meshitinde jamaǵatqa «Ádildik – aýqymy keń, maǵynasy tereń uǵym» taqyrybynda juma ýaǵyzyn aıtty.
Ýaǵyz barysynda bas ımam ádildiktiń ıslamdaǵy ornyna toqtalyp, onyń tek qoǵamdyq nemese quqyqtyq máselelermen shektelmeı, adamnyń kúndelikti ómirinen, otbasyndaǵy qarym-qatynasynan bastap qoǵam aldyndaǵy jaýapkershiligine deıingi barlyq salany qamtıtynyn atap ótti. Sondaı-aq Quran aıattary men Paıǵambarymyzdyń (oǵan Allanyń salaýaty men sálemi bolsyn) hadısteri negizinde ádildik pen amanatqa adal bolýdyń mańyzy túsindirildi.
Nurbek qajy Áýeshanuly ádildikti eń aldymen otbasydan bastaý qajettigin aıtyp, ata-ana men bala, erli-zaıyptylar arasyndaǵy ózara quqyq pen mindetke toqtaldy. Ásirese balalarynyń arasynda ádildik jasaý, otbasy músheleriniń bir-biriniń aqysyn saqtaý, jaýapkershilik pen syılastyqty nyǵaıtý shańyraq berekesiniń negizi ekenine nazar aýdardy.
Sonymen qatar qoǵamdaǵy turaqtylyq pen adamdar arasyndaǵy ózara senimniń qalyptasýynda ádildiktiń alar orny erekshe ekeni aıtyldy. Árbir azamat ózine júktelgen mindetti adal atqaryp, ózgeniń aqysyna qol suqpaı, amanatqa qııanat jasamaýy kerektigi sóz boldy.
«Ádildik – tek qoǵamnan talap etiletin qaǵıda emes. Ol ár adamnyń óz sózi men isine adal bolýynan, ózgeniń aqysyn qurmetteýinen bastalady. Ádildik ornaǵan jerde senim bekıdi, al senim bar jerde tatýlyq pen bereke ornyǵady», – dedi Nurbek qajy Áýeshanuly.
Juma ýaǵyzynyń sońynda bas ımam jamaǵatty árbir isinde ádildik pen adaldyqty berik ustanýǵa úndep, Alla Taǵaladan barshaǵa eki dúnıeniń jaqsylyǵyn tiledi.
Jıyn sońynda Nurbek qajy Áýeshanuly jamaǵatpen birge juma namazyn ótkizip, el amandyǵy men jurt tynyshtyǵyn tilep duǵa jasady.
