ASTANA QALASYNYŃ BAS IMAMY ZAǴIP JANDARǴA ARNALǴAN KITAPHANAǴA BARDY
Astana qalasynyń bas ımamy Nurbek qajy Áýeshanuly elordadaǵy kózi kórmeıtin jáne nashar kóretin azamattarǵa arnalǵan arnaıy kitaphanaǵa baryp, zaǵıp aqsaqaldar men aq jaýlyqty ájelerdi Máýlit merekesimen quttyqtady.
Júzdesýde qala bas ımamy qarııalar men kitaphana ujymyn qasıetti Máýlit aıymen quttyqtap, Paıǵambarymyzdyń (Oǵan Allanyń salaýaty men sálemi bolsyn) ónegeli ómiri men kórkem minezi jaıynda taǵylymdy nasıhat aıtty. Al, «Áziret Sultan» meshitiniń naıb ımamy Jumanazar Óserhanuly Máýlit jyryn oqyp, Paıǵambarymyzǵa salaýattar aıtyldy.
Jaıylǵan berekeli dastarhan basynda aqsaqaldar men ájeler ónerlerin ortaǵa salyp, kúı kúmbirlep, dástúrli án shyrqaldy.
Kezdesý barysynda qala bas ımamy kitaphanaǵa Braıl qarpimen jazylǵan Quran Kárimniń kóptomdyq basylymyn tartý etti. Sondaı-aq aqsaqaldar men ájelerge arnaıy ázirlengen «Máýlit syıy» qorapshalaryn tabystady.
Syı-qurmetke bólengen aqsaqaldar men aq jaýlyqty ájelerdiń qýanyshynda shek bolmady. Kóńilderi ósip, bir jasap qalǵan úlkender ózderiniń aqjarma alǵysyn aıtyp, izgi tilekterin jetkizdi.
«Shuǵyla» qoǵamdyq birlestiginiń tóraıymy, kitaphananyń Braıl júıesi boıynsha oqytýshysy Baqytjamal Káribaıqyzy bastaǵan kitaphana ujymy da qala bas ımamyna aq batasyn berip, rızashylyqtaryn bildirdi.
