ASTANADA QMDB-NYŃ 35 JYLDYǴYNA ORAI RÝHANI KESh ÓTTI (FOTO)
Búgin Astana qalasynda Qazaqstan musylmandary dinı basqarmasynyń 35 jyldyǵyna arnalǵan «Dinı basqarmaǵa – 35 jyl» atty rýhanı kesh uıymdastyryldy.
Kesh barysynda QMDB-nyń 35 jyldyq mereıtoıyna arnaıy túsirilgen derekti fılmniń tusaýkeseri ótip, kórermen nazaryna usynyldy. Sonymen qatar dinı basqarmanyń tarıhy men el rýhanııaty jolyndaǵy qyzmetin aıshyqtaıtyn sahnalyq kórinisti Astana mıýzıkl teatrynyń ártisteri qoıdy. Mereıtoılyq keshte arnaıy daıyndalǵan arnaýdy «Altyn dombyra» júldesiniń ıegeri, aqyn Maqsat Aqanov oryndady. Al tanymal ánshi Erjan Maksım patrıottyq rýhtaǵy «Atameken» ánin oryndap, kórermenderge erekshe áser syılady.
Bas múftı Naýryzbaı qajy Taǵanuly óz sózinde: «Búgin biz elimizdiń rýhanı ómirindegi erekshe tarıhı kezeńge kýá bolyp otyrmyz. Osydan otyz bes jyl buryn, 1990 jyly, halqymyzdyń rýhanı bolmysy men dinı birligin saqtaý maqsatynda Qazaqstan musylmandary dinı basqarmasy qurylǵan bolatyn. Bul – el tarıhyndaǵy aıtýly oqıǵa, halqymyzdyń táýelsizdikke aıaq basqan sátinde rýhanı táýelsizdiktiń irgetasyn qalaǵan mańyzdy kezeń edi. Alla Taǵalaǵa sansyz shúkirler bolsyn, sodan bergi jyldar ishinde Dinı basqarma elimizdiń dinı ómirinde berik orny bar, halyqtyń senimine ıe, dástúr men dindi ushtastyrǵan qara shańyraqqa aınaldy», – dedi.
Aıta keteıik, bıyl Qazaqstan musylmandary dinı basqarmasynyń qurylǵanyna 35 jyl tolyp otyr. Osy mereıli data aıasynda respýblıkamyzda jyl kóleminde túrli rýhanı is-sharalar men konferentsııalar uıymdastyrylýda.
