ASTANADA «ÚZDIK IMAM» I RESPÝBLIKALYQ INTELLEKTÝALDY BILIM SAIYSY BASTALDY
Búgin elordadaǵy «Áziret Sultan» meshitinde Qazaqstan musylmandary dinı basqarmasynyń uıymdastyrýymen «Úzdik ımam» I respýblıkalyq ıntellektýaldy bilim saıysy bastaldy.
Jarys qasıetti Quran Kárim aıattaryn oqýmen ashylyp, QMDB Tóraǵasy, Bas múftı Naýryzbaı qajy Taǵanuly arnaıy duǵa jasady.
«Jamaǵatqa ımamdyq etý – jaýapkershiligi mol mańyzdy qyzmet. Bul –Paıǵambarymyzdyń (oǵan Allanyń salaýaty men sálemi bolsyn) jolyn jalǵastyratyn qasıetti mindet. Adamdardy jaqsylyqqa shaqyryp, jamandyqtan tosý – uly istiń biri. Sol sebepti Paıǵambarymyzdyń (oǵan Allanyń salaýaty men sálemi bolsyn) úmbeti qaýymdardyń qaıyrlysy boldy. Alla Taǵala Quranda bylaı deıdi: «Sender adam balasy úshin ıgilikti ámir etip, jamandyqtan tyıatyn, sondaı-aq, Allaǵa senetin úmbetterdiń qaıyrlysy bolyp jiberildińder»(«Álı Imran» súresi, 110-aıat).
Paıǵambarymyzdyń (oǵan Allanyń salaýaty men sálemi bolsyn): «Imam – basshy ári qolastyndaǵylarǵa jaýapty» degen hadısi bul saladaǵy tulǵalardyń qanshalyqty mańyzdy mindetti atqaryp júrgenin kórsetedi. Árıne, mundaı jaýapkershilikti atqarý úshin ımamdarymyzǵa óz bolmysymen úlgi-ónege bolatyn, din isi men dúnıe isin qatar alyp júretin kórkem minez-qulyq pen ustazdyq qabilet-qasıetter, belsendilik pen adamgershilik sıpattaraýadaı qajet», – dedi QMDB Tóraǵasy.
Aıta keteıik, respýblıkalyq deńgeıde alǵash ret uıymdastyrylyp otyrǵan baıqaýda qatysýshylar «Qasıetti Quran», «Babalar danalyǵy», «Din men dástúr», «Hadıs shárip» jáne «Kórkem nasıhat» kezeńderi boıynsha ózara saıysqa túsedi.
