ASTANADA «ÚZDIK IMAM» II RESPÝBLIKALYQ INTELLEKTÝALDY BILIM SAIYSY BASTALDY

Búgin elordadaǵy «Áziret Sultan» meshitinde Qazaqstan musylmandary dinı basqarmasynyń uıymdastyrýymen «Úzdik ımam» II respýblıkalyq ıntellektýaldy bilim saıysy bastaldy.

Jarys qasıetti Quran Kárim aıattaryn oqýmen ashylyp, QMDB Tóraǵasy, Bas múftı Naýryzbaı qajy Taǵanuly arnaıy duǵa jasady.

«Barshańyzdy «Úzdik ımam» II respýblıkalyq ıntellektýaldy bilim saıysynyń bastalýymen shyn júrekten quttyqtaımyn! Bul baıqaý jaı ǵana bilim jarysy emes. Bul ımamnyń ilimin tarazylaıtyn, izdenisin shyńdaıtyn, bilimi men biligin el ıgiligine jumsaýǵa jigerlendiretin mańyzdy rýhanı-tanymdyq basqosý dep sanaımyn.
 
Sondyqtan bilim dodasyna qatysyp otyrǵan árbir ımamdy jeńimpaz dep esepteımin. Óıtkeni, sizder oblys pen iri qalalarda jeńimpaz atanyp, respýblıkalyq saıysqa túsip otyrsyzdar. Búgingi bilim baıqaýyna qatysyp, bilimderińizdi jetildirýge umtylýdyń ózi úlken jetistik emes pe? Endeshe, sizderge bilim saıysynda sáttilik tileımin. Alla Taǵala zeıinderińizdi ashyp, berekesin jaýdyrsyn», – dedi QMDB Tóraǵasy.

Aıta keteıik, respýblıkalyq deńgeıde ekinshi ret uıymdastyrylyp otyrǵan baıqaýda qatysýshylar «Qasıetti Quran», «Hadıs shárip», «Babalar danalyǵy», «Din men dástúr», jáne «Kórkem nasıhat» kezeńderi boıynsha ózara saıysqa túsedi.