ASTANADA JAŃA MEShIT AShYLDY (FOTO)

Búgin, qasıetti juma kúni elordasy Astana qalasynda jańadan salynǵan meshittiń ashylý saltanaty ótti. Igi is-sharaǵa QMDB Tóraǵasy, Bas múftı Naýryzbaı qajy Taǵanuly arnaıy qatysty.

Alla Taǵalanyń 99 kórkem esiminiń biri «ál-Fattah» ataýy berilgen qulshylyq ordasynyń ashylý rásiminde Bas múftı: «Allaǵa shúkir, elimizde, osy astanamyzda meshitterimizdiń qatary kóbeıip keledi. Meshit – meıirimdilik mekeni, rýhanııattyń ortasy. Qoǵamdy izgilikke shaqyryp, ıbaly bolýǵa úıretetin mektep. Ardaqty Paıǵambarymyz (oǵan Allanyń salaýaty men sálemi bolsyn) bir hadısinde: «Kimde-kim jer betinde meshit bastasa, Alla Taǵala ol pendesine jánnattan saraı turǵyzady»degen. Osy meshittiń boı kóterýine atsalysqan, uıytqy bolǵan arda azamattarǵa Alla razy bolsyn! Kásipterine bereke, otbasylaryna amandyq tileımin» dedi.

Óz kezeginde QMDB Tóraǵasy meshit bastap, ony halyqtyń ıgiligine bergen azamattarǵa rızashylyǵyn bildirip, alǵys hatpen marapattady. Sondaı-aq jańa meshittiń ashylý saltanatynda memleket jáne qoǵam qaıratkerleri, aqsaqaldar sóz sóılep, bata berdi.

Meshitke Bas múftı buıryǵymen elorda jamaǵatyna jaqsy tanys din qyzmetkeri Baǵdat Abdýlkarımov taǵaıyndaldy. Buǵan deıin «ál-Ǵanı» meshitinde qyzmet etken ımamdy juma namazyna jınalǵan jamaǵatqa QMDB Tóraǵasy Naýryzbaı qajy Taǵanuly tanystyryp, eńbegine bereke tiledi.

Aıta keteıik, Astana tórinde el ıgiligine berilgen on besinshi meshitte 500 adam erkin ǵıbadatyn óteı alady. «Ál-Fattah» meshiti namaz zalynan bólek, dárishana, ımamdar bólmesi men Quran oqý bólmesi, erler jáne áıelder dárethanasymen qamtylǵan.

 

Источник: Aidos