Astanadaǵy qaıǵyly oqıǵa: ımamdar arnaıy duǵa jasady (FOTO)
Tilsiz jaýdyń qurbanyna aınalǵan bes búldirshinniń qazasy kúlli qazaq jurtynyń qabyrǵasyn qaıystyrdy. Astana qalasyndaǵy Kóktal turǵyn alabyndaǵy órtke oranǵan ýaqytsha baspana bes birdeı jas óskinniń máńgilik mekeni bolar dep kim oılaǵan?!
«Tas túsken jerine aýyr» demekshi, orny tolmas jas qazanyń alapat salmaǵy ata-anasyn da, aǵaıyn-týystaryn da eseńgiretip, janyn janshyǵanyn aıtyp jetkizý múmkin emes. Alaıda, «qaıǵyny bólisseń azaıdy» demekshi, aýyr qazaǵa ortaqtasyp, qanatymen sý sepken qarlyǵashtaı járdem jasaýǵa umtylǵandar bes balasynan bir kúnde kóz jazǵan qaraly januıanyń qasynan tabylyp, demeý bolýǵa tyrysýda.
Osy oraıda, QMDB tóraǵasynyń birinshi orynbasary, naıb múftı, Astana qalasynyń bas ımamy Naýryzbaı qajy Taǵanulynyń tóraǵalyǵymen Elorda meshitteriniń bas ımamdary basqosý ótkizip, qaıǵyly oqıǵaǵa oraı qaıyrymdylyq sharalaryn uıymdastyrý jaıyn talqylady. Ata-anasynyń jaraly jandaryn jubatyp, qol ushyn sozý jaıyn talqylaǵan otyrysqa QMDB Nasıhat jáne qoǵammen baılanys bóliminiń meńgerýshisi Altynbek Utyshanuly, Baspasóz hatshysy Aǵabek Qonarbaıuly qatysyp, óz pikirlerin qosty.
Jınalys barysynda meshit ımamdaryna janaza rásimine qatysty naqty tapsyrmalar berilip, qaıyrymdylyq sharasyna úndedi. Taǵdyr synaǵyna túsken otbasyǵa qoldan kelgenshe kómek kórsetip, jappaı janashyrlyq tanytýǵa shaqyrdy. Basqosý sońynda qazanyń arty qaıyrly bolýyn tilep, qaıǵy jamylǵan otbasyǵa arnaıy duǵa jasaldy.
