ASTANALYQ QARI QURAN BAIQAÝYNDA 1-ORYNDY IELENDI

Búgin Aqtóbe qalasyndaǵy «Nur Ǵasyr» meshitinde Qazaqstan musylmandary dinı basqarmasynyń uıymdastyrýymen ótken Quran Kárimdi jatqa jáne mánerlep oqýdan HV respýblıkalyq baıqaýy óz máresine jetti. Eki kúnge sozylǵan dúbirli dodaǵa elimizdiń ár óńirinen 80 úmitker qatysyp, qasıetti Qurandy jatqa oqý jáne mánerlep oqý sheberlikterin synǵa saldy.

Baıqaý qorytyndysynda Astana qalasynyń ókili Aıqyn Aqylbekuly Qurannyń 20 parasyn jatqa oqý atalymy boıynsha 1-oryndy ıelendi. Ol júldegerler qatarynan kórinip, 3 000 000 teńge kólemindegi aqshalaı syılyqqa ıe boldy.

Qarılardy marapattaý rásimine QMDB Tóraǵasy, Bas múftı Naýryzbaı qajy Taǵanuly, saýapty is-sharaǵa demeýshilik jasaǵan Baharıdın Ablazımov, zııaly qaýym ókilderi men qala turǵyndary qatysty.

Marapattaý rásiminde Bas múftı baıqaýǵa qatysqan qarılardyń Quranǵa degen qurmeti men bilimin joǵary baǵalap, bul dodanyń jaı ǵana jarys emes, qasıetti kitapqa degen qurmettiń merekesi ekenin atap ótti.

Bul baıqaýda tek júlde alǵandar ǵana jeńiske jetken joq. Quran úshin jol júrip kelgen árbir qatysýshy – jeńimpaz. Kún saıyn Quran jattaýǵa ýaqyt bólgen shákirt – jeńimpaz. Balasyna Quran úıretýge jaǵdaı jasaǵan ata-ana – jeńimpaz. Shákirtiniń árbir árpin túzep, árbir súresin tyńdaǵan ustaz – jeńimpaz. Sebebi Quran jolyndaǵy eń úlken jeńis – Allanyń razylyǵyna umtylý. Qasıetti Qurannyń sharapaty barshamyzǵa jaýsyn!», – dedi Naýryzbaı qajy Taǵanuly.

Baıqaý sońynda Bas múftı Naýryzbaı qajy Taǵanuly uıymdastyrýshylarǵa, Aqtóbe oblysynyń ımamdaryna, qazylar alqasyna jáne is-sharanyń bas demeýshisi Baharıdın Ablazımovqa alǵysyn bildirdi.

Источник: Aisha