Astananyń 20 jyldyǵyna oraı dýatlonnan qalalyq týrnır ótti (FOTO)
Búgin Astana qalasynyń 20 jyldyq mereıtoıynyń qurmetine oraı Elorda turǵyndarynyń arasynda dýatlonnan ashyq týrnır bolyp ótti. Salaýatty ómir saltyn nasıhattaýǵa baǵyttalǵan bul týrnırge qatysýshylar 5 shaqyrymdy jaıaý júgirip ótip, 20 shaqyrymdy velosıpedpen eńserdi. Astana qalasynyń ákimdigi men Mádenıet jáne sport basqarmasynyń, «Sporttyq buqaralyq is-sharalardy ótkizý dırektsııasynyń, Astana Trıatlon federatsııasynyń birlese uıymdastyrýymen júzege asyp kele jatqan bul dástúrli shara halyq arasynda sportqa degen súıispenshilikti arttyryp, jyldan jylǵa qatysýshylardyń da qatary kóbeıip keledi.
«Báıterek» monýmentinen bastaý alǵan qalalyq marafon qatysýshylary Qonaev, Qabanbaı batyr, Aqmeshit, Dostyq jáne Máńgilik el kósheleri arqyly júgirip ótti. Sonymen qatar, Qonaev kóshesi, Turan dańǵylynan «Astana juldyzdary» monýmentine deıin (Qabanbaı batyr dańǵylymen aınalma jol), sodan soń keri burylyp Turan dańǵyly arqyly Dostyq kóshesine deıin 20 shaqyrymdy velosıpedpen baǵyndyrdy.
Aıtýly týrnırge respýblıkalyq «Áziret Sultan» meshitiniń qyzmetkerleri de belsene atsalysyp, búgingi kúndi boı sergitken jattyǵýmen bastap qaıtty. Allanyń bergen amanaty – densaýlyqqa durystap kóńil bólip, sportty serik etýge sózimen de, úlgi áreketimen de úndeı bilgen Bas meshit qyzmetkerleri birinshi bolyp máre syzyǵyn qımasa da, qalyń jurtshylyqtan qalyspaı dýatlon medalin taǵynyp qaıtty.
