Atyraýda «Halyq arna» telearnasynyń fılıaly ashyldy (FOTO)
Búgin Atyraýda «Halyq arnanyń» aımaqtaǵy fılıaly ashylyp, jumysyn bastady. Qazaqstan musylmandary dinı basqarmasy tól arnasynyń fılıaly tuńǵysh ret Atyraý oblysynda ashylyp otyr.
Ortalyq «Imanǵalı» meshiti janynan jumysyn bastaǵan kanaldyń ashylý rásimi qasıetti Quran aıattaryn oqylýymen bastaldy. Budan soń Bas múftı Naýryzbaı qajy Taǵanulynyń quttyqtaý haty oqyldy.
«Qazirgi ýaqytta ımamdar aldynda aqparat alańyna ıelik etý mindeti tur. Qoǵamǵa qajetti, izgilikti tý etip kóteretin, adamgershilikke shaqyryp, oı salatyn taqyryptardy kóterip, súbeli suhbattar uıymdastyryp, áserli ýaǵyz-nasıhat júrgizý qajet. Jańa stýdııa qundy aqparat pen qunarly ýaǵyzdyń alańy bolsyn dep tileımin» delingen quttyqtaýda.
Fılıaldyń ashylý rásimine arnaıy qatysqan Aqparat jáne qoǵammen baılanys bóliminiń meńgerýshisi Marat Bektazınov jahandaný dáýirinde kez kelgen salada shuǵyl ári naqty derek kózine aınalýdyń mańyzdy ekenin atap ótti.
«Qazaqstan musylmandary dinı basqarmasynyń basty maqsaty – buqara arasynda asyl dinimizdi, dilimizdi, dástúrimizdi keńinen dáripteý. Múftııatqa qarasty 19 ókildik bolsa, alǵash bolyp Atyraýda ashylyp otyrǵan «Halyq arnanyń» fılıaly rýhanı, mádenı jańalyqtar ordasyna aınalady dep senemin» dedi Marat Bektazınov.
Atyraý oblysynyń bas ımamy Altynbek Utyshanulynyń aıtýynsha, elimizdiń rýhanııat salasynda aıtýly jańalyq oryn alyp otyr.
«Aqparat salasynyń mańyzyna der kezinde nazar aýdarǵan Bas múftı Naýryzbaı qajy Taǵanuly «Halyq arnasynyń» ashylýyna tikeleı yqpal etti. Aqparat keńistigine endi jol salǵan «Halyq arna» óz aýdıtorııasy bar iri kanalǵa aınalaryna senemiz» deıdi Altynbek Utyshanuly.
Fılıal stýdııasy tórt bloktan turady. Arnaıy jasaqtalǵan stýdııalar televızııalyq habarlar, rýhanı suhbattar, túrli formattaǵy túsirilimder jasaýǵa múmkindik beredi. Televızııa salasyna qajetti zamanaýı qural-jabdyqtarmen qamtamasyz etilgen stýdııa osylaısha oblystaǵy rýhanı, dinı jańalyqtar týraly habarlardy respýblıka kóleminde taratýǵa múmkindik berip otyr.
Atap óterligi, karantın talaptary qatań saqtalyp ótken saltanatty sharaǵa Atyraý oblysy Din isteri basqarmasynyń basshysy Haırolla Kóshqalıev, Atyraý oblystyq ardagerler keńesi tóraǵasynyń orynbasary Serik Qaljanuly, «Atyraý-Aqparat» medıaseriktestiginiń dırektory Ysqaq Egemberdıev, «Atyraý» telearnasynyń dırektory Qanat Áýesbaı, aqsaqaldar jáne jergilikti medıa salasynyń ókilderi qatysty.
Eske sala keteıik, byltyr QMDB-nyń 30 jyldyq mereıtoıy qarsańynda múftııat janynan «Halyq arna» telearnasy ashylǵan bolatyn. Búgingi tańda telearna «Otaý TV», «IdTV» kabeldik jelileri arqyly habar taratyp keledi.
