ATYRAÝDA JAŃA MEShIT AShYLDY (FOTO)

Osydan bir jarym jyl buryn Bas múftı Naýryzbaı qajy Taǵanuly óz qolymen irgetasyn qalaǵan Atyraý qalasyna qarasty Erkinqala aýylynyń meshiti búgin paıdalanýǵa berildi.

850 oryndyq meshitke Qaıtpaı Sultan esimi berilse, ashylý saltanatyna QMDB Tóraǵasynyń orynbasary, naıb múftı Ershat Aǵybaıuly, Atyraý oblysy ákiminiń orynbasary Jasulan Bısembıev jáne oblys bas ımamy Altynbek Utyshanuly arnaıy qatysty.

Aýyl aqsaqaldary, jergilikti turǵyndardyń basyn qosqan saltanatty jıynda naıb múftı Ershat Aǵybaıuly jurtshylyqqa Bas múftı Naýryzbaı qajy Taǵanulynyń  quttyqtaýyn jetkizdi.

«Halqymyzda «Azany bar aýyl azbaıdy» degen keremet támsil bar. Meshit – qulshylyqtyń, tárbıeniń ordasy. Bul jerde ımandy urpaq tárbıelenip shyǵady, aǵartýshylyq baǵytta aýqymdy jumystar atqarylady dep senemin.

Meshit meıirimdilik pen izgiliktiń, qaıyrymdylyq pen bilim beretin rýhanı orta. Meshittiń ishin kórkeıtetin jamaǵat. Sondyqtan, Erkinqala aýylynyń turǵyndaryn sáýleti jarasqan Alla úıiniń ashylýymen taǵyda quttyqtaımyn», – dedi naıb múftı Ershat Ońǵarov.

Óz kezeginde Atyraý oblysynyń bas ımamy Altynbek Utyshanuly meshit qurylysyna atsalysqan jomart jandar – Bulanbaı Aqqulov pen Darhan Sársenovke Bas múftıdiń alǵys hatyn tabys etip, jurtshylyqqa meshittiń ımamyn tanystyrdy.

Jańa meshitke bas ımam bolyp buǵan deıin Jylyoı aýdandyq ortalyq meshitinde naıb ımam qyzmetin atqarǵan Ajok Saıasatuly Sarsekeev taǵaıyndaldy.