«Áziret Sultan» meshiti naýqas sábılerge «Ramazan syılyǵyn» úlestirdi (FOTO)
Búgin Astana qalasyndaǵy respýblıkalyq «Áziret Sultan» meshiti «Ana men bala» Ulttyq ǵylymı ortalyǵynda em qabyldap jatqan naýqas sábılerge arnap qaıyrymdylyq sharasyn ótkizdi. «Zeket» qorynyń Astana qalasyndaǵy ókildigimen birlese uıymdastyrylǵan «Sábı saýlyǵy – ult bolashaǵy» sharasy aıasynda osy ortalyqta emdelip jatqan sal aýrýyna shaldyqqan sábılerge «Ramazan syılyǵy» jasaldy.
QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanuly bastaǵan meshit qyzmetkerleri búgin arnaıy «Ana men bala» ortalyǵyn zııarat etip, «Ramazan syılyǵyn» tabystap qaıtty. Qasıetti aıdyń qurmetine oraı uıymdastyrylǵan shara aıasynda ortalyqtaǵy bilikti mamandardyń eminen shıpa izdegen 20 otbasyǵa qarjylaı kómek kórsetildi. Sondaı-aq, jalpy somasy 300 000 teńgege naýqas sábılerge qajetti jaıalyq-jabdyqtar, arnaıy ezbeler men taǵam túrleri jáne búldirshinderge Ramazan meıirimin sezindirý maqsatynda túrli oıynshyqtar tartý etildi. Buǵan qosa, merekelik kóńil-kúı syılaý úshin kásibı kloýn shaqyrylyp, syrqatynan mezi bolǵan sábılerdi shat kúlkisin qaıta jańǵyrtyp, júzderine kúlki úıirdi.
Aıta keteıik, respýblıkalyq «Áziret Sultan» «Ana men bala» ortalyǵyna únemi járdem qolyn, qaıyrymdylyq sharalaryn uıymdastyryp keledi. Ár toqsan saıyn «Áziret Sultan» meshitiniń áıel jamaǵaty uıymdastyratyn «Qaıyrymdylyq jármeńkesinen» jıylǵan qarajattyń túgeldeı osy ortalyqqa baǵyttalyp, naýqas sábılerdiń em-domyna jumsalyp kele jatqanyna da biraz jyldyń júzi boldy. Qaıyrymdylyq sharasynda osy jaıynda erekshe atap ótken Ortalyq qyzmetkerleri «Áziret Sultan» meshitine óz alǵystaryn bildirip, Naýryzbaı qajy Taǵanulyna arnaıy «Alǵys hat» ta tabystady.
Sharaǵa qatysqan ata-analar qaýymy da «Áziret Sultan» meshitiniń búgingi sharasyna óz rızashylyqtaryn bildirip, alǵystaryn jaýdyryp jatty. Tipti, arnaıy ortaǵa shyǵyp, ata-analar tarapynan rahmet aıtyp jatqandar da boldy. Shara sońynda Naýryzbaı qajy Taǵanuly syrqat sábıler úshin arnaıy duǵa jasap, sábılerdiń tezirek saýyǵyp, aman-esen otbasylaryna oralýyn tiledi.
