«ÁZIRET SULTAN» MEShITINDE JAŃA OQÝ MAÝSYMYNYŃ AShYLÝ SALTANATY ÓTTI (FOTO)
Astana qalasyndaǵy «Áziret Sultan» meshitinde Bas ımam Erbolat Júsipovtiń jetekshiligimen áıel jamaǵatyna arnalǵan jańa oqý maýsymynyń ashylý saltanaty ótti.
Is-sharaǵa QMDB Dinı bilim jáne kadr daıyndaý bóliminiń meńgerýshisi Hasan Amanqulov, Astana qalasy Áıel-qyzdar sektorynyń jetekshisi Kúlsara Beket jáne basqa da meshit ustazdary men shákirtter qatysty.
Jıyn barysynda qala bas ımamy bilim alýdyń musylman ómirindegi mańyzyna toqtalyp, jamaǵatty bilimge degen yqylasyn arttyra túsýge shaqyrdy. Áıelderdiń dinı saýatyn ashýy otbasy tárbıesi men qoǵamnyń rýhanı damýy úshin úlken mánge ıe ekenin atap ótti.
Sonymen qatar, ustaz Hasan Amanqulov shákirtterge sáttilik tilep, árbir alǵan bilimniń ómirde amanat retinde qoldanylýy kerektigin jetkizdi. Ol meshit ustazdarynyń eńbegin joǵary baǵalap, olardyń shákirt tárbıeleýdegi jaýapkershiligin aıryqsha atap ótti.
Saltanatty jıynda ustazdar jańa oqý maýsymynyń dárister kestesin tanystyrdy. Jańa baǵdarlamada Quran oqý, tájýıd, aqıda, fıqh jáne otbasy qundylyqtaryna arnalǵan sabaqtar qamtylǵan. Sonymen qatar din qyzmetkerleri shákirtterdiń suraqtaryna jaýap berip, aldaǵy ýaqyttaǵy oqý-ádistemelik josparlarmen bólisti.
Sýretterdi «FOTOGALEREIa» aıdarynan kóre alasyz!
Источник: Aidos
