«ÁZIRET SULTAN» JAMAǴATYMEN «ÚMIT SÁÝLESI» KITABYNA ShOLÝ JASALDY (FOTO)
«Áziret Sultan» meshitinde jamaǵatqa ımandylyq pen izgilikke bastaıtyn mazmuny túsindirildi. Jınalǵan qaýymǵa meshittiń naıb ımamy, dinı oqý-aǵartý baǵytynyń jetekshisi Qasym Mahmud rýhanı eńbekke sholý jasap, onyń mán-mańyzyn atap ótti.
«Úmit sáýlesi» kitabynda sabyr men tózimdiliktiń, dostyq pen adamgershiliktiń, ýaqyttyń qadiri men ómirdiń mánin tereń uǵynýdyń qyr-syry baıandalady. Árbir taraý oqyrmandy oılandyryp qana qoımaı, júregine senim uıalatyp, ómirge jigermen qaraýǵa jeteleıdi. Kitaptyń negizgi ózegi – adamnyń qaı sátte de úmitin úzbeı, Rabbysyna súıenip ómir súrýi.
Bul eńbek – kez kelgen jannyń rýhanı azyǵyna aınalatyn qundy dúnıe. Kitapty qolǵa alǵan oqyrman júreginde tynyshtyq taýyp, ómirdiń árbir sátin qadirleı bilýdiń mánin sezine alady. «Úmit sáýlesi» tek oqýǵa ǵana emes, jandy tárbıeleýge baǵyttalǵan tálimdi týyndy retinde jamaǵatqa zor úles qosady.
