BAÁ elshisi Astananyń turmysy tómen otbasylaryna 100 tigin mashınasyn syılady (FOTO)
Sondaı-aq, mashınalar tigin men pishýdi úırengisi keletinderge de syılandy.
Astana qalasy ákimdigi men Birikken Arab ámirligi elshiligi halyqtyń áleýmettik turǵydan az qamtylǵan otbasylarǵa 100 tigin mashınasyn syıǵa tartý etti, dep habarlaıdy BNews.kz elorda ákimdiginiń resmı saıtyna silteme jasap.
"Rýhanı jańǵyrý" baǵdarlamasy aıasynda Astana ákimdigi Birikken Arab ámirligi elshiligimen birlesip, birqatar sharalardy iske asyrýda. Sonyń biri "Óndiristi otbasy" qaıyrymdylyq jobasy. Halyqtyń áleýmettik osal tobynyń adamdaryn qoldaý úshin Birikken Arab ámirliginiń Tótenshe jáne ókiletti elshisi doktor Muhammed Ahmed Ál-Jabır muqtajdarǵa 100 tigin mashınasyn syıǵa tartty. Uıymdastyrýshylar syıǵa berilgen mashınalar úlken paıda ákeledi dep úmittenedi.
"Astana ákimdigi kómekke muqtaj sanattaǵy adamdardy anyqtady. Árbir mekeme tizimdi jasaqtady. Zamanaýı tigin mashınalary meshitke, Din máselelerin zertteý ortalyǵyna, daǵdarys ortalyǵyna júginetin qyz-kelinshekterge berildi. Sondaı-aq, mashınalar tigin men pishýdi úırengisi keletinderge de syılandy. Bolashaqta bul olardyń óz isin ashyp, jaǵdaılaryn jaqsartýǵa septigin tıgizýi de múmkin", - deıdi qoǵamdyq damý isteri basqarmasynyń basshysy Danııar Esın.
Almahan Qabdyrashtyń tiginmen aınalysqanyna 5 jyl boldy. Onyń aıtýynsha, endi alatyn tapsyrysynyń sany men sapasy kóbeıip, tabysy da arta túspek.
"Biz kórpe-tósek, jaıma jamylǵylaryn tigemiz. Jańa mashına satyp alýǵa aqsha bolmaǵandyqtan kóp mólsherde tapsyrys qabyldamaıtynbyz. Qolmen kóp nárse tyndyra almaısyń ǵoı, onyń ústine kóp ýaqyt alady. Al endi tapsyrysym kóbeıe túsedi dep úmittenem. Qýanyshymda shek joq. Metsenattarǵa paıdaly syılyq jasaǵany úshin alǵysymdy bildiremin", - dedi Almahan Qabdyrash.
Aıt keteıik, jastar men áıelderdi ary qaraı óz isin damytý úshin Nátıjeli jumyspen qamtý jáne jappaı kásipkerlikti damytý baǵdarlamasy aıasynda Halyqty jumyspen qamtý ortalyǵy tigin men kıim pishýdi úıretetin trenıngter men master-klastar uıymdastyratyn bolady.
Astanada 2018 jyldyń basynan beri Nátıjeli jumyspen qamtý jáne jappaı kásipkerlikti damytý baǵdarlamasynyń sheńberinde Halyqty jumyspen qamtý ortalyǵy 700 adamdy qysqa merzimdi kásibı oqytýdan ótkizdi, onyń ishinde jumysqa turmaǵan jastar da bar. Qazirgi tańda 333 adam oqytýdan ótip jatyr (aspaz – 24, shashtaraz – 48, tigin – 44, erler tiginshisi – 41, naýbaıshy – 22, kassa baqylaýshysy – 17, tárbıeshi – 17, admınıstrator – 3, manıkıýr sheberi – 25, kondıter – 25, saýda menedjeri – 8).
Oqytý kezinde aı saıyn 16 759 teńge kóleminde stıpendııa tólenedi. Oqýdy sátti aıaqtaǵan soń kýálik pen biliktilik beriledi, jumysqa turýǵa jáne jańa kásip meńgerýge kómek kórsetiledi.
29 jasqa deıingi kez kelgen jumysqa ornalaspaǵan azamat kásibı oqytý boıynsha tegin kýrsty kelip oqyp, ózi qyzyǵatyn salany tańdap, ózin ózi damyta alady.
Sonymen qatar, keshki ýaqytta da jastardy kásibı oqytýdan tómendegideı suranysqa ıe mamandyqtarmen oqytý josparlanyp otyr: mobıldi qosymsha ázirleýshi, kıberqaýipsizdik salasyndaǵy maman, anımatsııa jáne vıdeografıka, avtoElektrık, álsiz tokty júıeler montajnıgi (domofon júıesine qyzmet kórsetý), KIPıA slesari (baqylaý-ólsheýish quraly jáne avtomatızatsııa), lıfter, D sanatynyń júrgizýshisi (V, S, D1 sanaty quqyǵy bar júrgizýshiligi bolýy mindetti), massajıst (medıtsınalyq bilimi bolýy mindetti).
Nátıjeli jumyspen qamtý jáne jappaı kásipkerlikti damytý baǵdarlamasymen tolyǵyraq prz.enbek.gov.kz saıtynan tanysýǵa bolady.
