BAS IMAM «ÁLJAN ANA» MEShITINDE JUMA ÝAǴYZYN AITTY

Astana qalasynyń bas ımamy Nurbek qajy Áýeshanuly elordadaǵy «Áljan ana» meshitinde juma ýaǵyzyn aıtty. «Úmit izgilikke jeteleıdi» taqyrybyna arnalǵan nasıhatta bas ımam Allanyń raqymynan úmit úzbeý, qıyndyqqa moıymaý jáne izgi amaldarǵa umtylý jaıyn qozǵady.

Nurbek qajy Áýeshanuly úmittiń adamǵa jiger berip, jaqsylyqqa bastaıtynyn aıta kele, musylmannyń Jaratýshynyń meıiriminen kúder úzbeı, táýbe men izgi amalǵa den qoıýy kerektigin jetkizdi.

«Úmit adam júregine jiger syılap, ómirine mán beretin, jaqsylyqqa umtyldyratyn asyl qasıet. Adam balasy qandaı qıyndyqqa tap bolsa da, júregindegi úmit sáýlesi oǵan kúsh-qýat berip, alǵa qadam basýyna jol ashady. Islam dininde úmit – musylmannyń Alla Taǵalanyń sheksiz raqymy men meıirimine degen seniminiń kórinisi. Shynaıy múmin Jaratýshysynyń keńshiliginen úmit etip, kúnásine táýbe jasaıdy, qulshylyǵyn arttyrady, ıgi amaldarǵa umtylady. Sondyqtan úmit júrekti jaqsylyqqa bastaıtyn, adamdy izgi amalǵa jigerlendiretin jáne Alla Taǵalaǵa jaqyndata túsetin uly rýhanı qundylyq», – dedi bas ımam.

Ýaǵyz barysynda Quran aıattary men hadıster negizinde úmit pen úreıdiń musylman ómirindegi orny túsindirildi. Bas ımam Allanyń raqymynan úmit etýdi kúnáǵa jeńil qaraýmen shatastyrmaý kerektigin aıtyp, shynaıy úmit táýbege kelýge, jaýapkershilikti sezinýge jáne ıgi isterdi kóbeıtýge jeteleıtinin atap ótti.

Juma ýaǵyzynan keıin Nurbek qajy Áýeshanuly jamaǵatpen birge juma namazyn oqyp, el tynyshtyǵy men berekesi úshin duǵa-tilekter jasaldy.