Bas ımam: Ár qazaqtyń tórinde dombyramyz ilýli tursyn
Ulttyq dombyra kúni qarsańynda Astana qalasynyń bas ımamy Nurbek qajy Áýeshanuly elordadaǵy dombyra jasaıtyn sheberge arnaıy bardy. Bas ımam sheber Baýyrjan Ardaqulynan unatqan dombyrasyn tartyp kórip, jas kásipkerdi qoldaý maqsatynda ulttyq aspapty satyp aldy. Nurbek qajy Áýeshanuly óz sózinde babalarymyzben birge jasasyp, sherin tarqatyp, syryn aıtqan san qyrly jádigerdi shaǵyn ǵana tseh ashyp, ustalyq mektebimizdi jańǵyrtyp jatqan jastardy qoldaý kerek, mine bul babalar joly jáne ár dombyrany yqylaspen jasaý úlken eńbek dedi bas ımam.
«Adam óziniń jaqsy kórgen, unatqan isimen aınalysqanda odan nátıje shyǵady. Qazaq atamyz aǵash bir jerde turyp kókteıdi deıdi. Onyń ishinde ultymyzdyń san ǵasyrlyq murasyn jańǵyrtý jolynda eńbek etý naǵyz ultjandylyq dep bilemiz. Ǵalymdar dombyranyń shyǵý tarıhyn myńdaǵan jyldarǵa áketedi. Kúni keshe paıda bolǵan aspap emes. Prezıdentimiz jaqynda dombyramyz álemge tanylyp ulttyq brendke aınalýy tıis degendi aıtty. Qazir bir qýanarlyǵy mektepterde myńdaǵan bala kúı tartyp, dombyra oınap álemdik sahnalarǵa da shyǵyp júr. Sondyqtan dombyramyzǵa suranys bar. Qazaq ózi muńyn, sherin, qaıǵy men qýanyshyn kúımen jetkizgen halyq qoı. Ár kúı bir ańyz, bir shejire. Osy joldaǵy eńbekterińiz elene bersin. Men Sizderdi qoldap kelip otyrmyn. Ár qazaqtyń tórinde dombyramyz ilýli tursyn. Ulttyq dombyra kúni qutty bolsyn» dedi bas ımam.
Baýyrjan Ardaquly jańǵaq aǵashynan jasalǵan jańa dombyrany kórsetip, ulttyq muramyzǵa qoldaý kórsetken din qyzmetkerlerine rızashylyǵyn jetkizdi. Kezdesý sońynda bas ımam sheberge qosylyp bir kúı oryndady.
