Bas ımam bastaǵan ujym taratý jumystaryn turaqty túrde qolǵa aldy (FOTO)

Elimizde jarııalanǵan tótenshe jaǵdaı baılanysty Nur-Sultan jáne Almaty qalalary boıynsha «Biz birgemiz» qaıyrymdylyq aktsııasy aıasynda áleýmettik kómek úlestirý jumystary áli de jalǵasý ústinde. Qazaqstan Respýblıkasynyń Tuńǵysh prezıdenti Nursultan Nazarbaevtyń bastamasymen júzege asqan ıgi shara sharapaty jospar boıynsha Bas shahardaǵy 5000-nan astam otbasyny qamtýy tıis. 19-naýryzdan bastalǵan qaıyrymdylyq sharasy sáýir aıyna deıin jalǵasatyn bolmaq.

Atalmysh áleýmettik kómek paketterin taratý jumystaryna QMDB Nur-Cultan qalasy ókildiginiń qyzmetkerleri bastalǵan kúnnen beri qyzý qoldaý kórsetip keledi. Qalanyń bas ımamy Erbolat Júsipov bastaǵan dinı qyzmetkerler ujymy qaıyrymdylyq aktsııasyna kún saıyn qol ushyn sozyp, kómekke muqtaj jandarǵa arnaıy azyq-túlik qory men gıgıenalyq zattar jıyntyǵyn jetkizip berýdi ıgi úrdiske aınaldyrýda.