BAS IMAM «DÁSTÚRLI ISLAM JÁNE JAT AǴYMDARDYŃ AIYRMAShYLYǴY» TAQYRYBYNDA ÝAǴYZ AITTY

Astana qalasynyń bas ımamy Nurbek qajy Áýeshanuly elordadaǵy «Ábý Nasyr Ál-Farabı» meshitinde «Dástúrli Islam jáne jat aǵymdardyń aıyrmashylyǵy» taqyrybynda ýaǵyz aıtty. Beısenbilik dastarhan basynda ótken dáriske meshittiń bas ımamy Nurlan Ramazanov bastaǵan meshit ımamdary men din qyzmetkerleri jáne jamaǵat qatysty.

Bas ımam qazirgi aqparattyq keńistikte dinge qatysty túrli pikirler men dinı mazmundaǵy materıaldardyń kóbeıgenin atap ótip, musylman adam úshin dindi durys derekkózderden úırenýdiń mańyzdylyǵyna toqtaldy.

Nurbek qajy Áýeshanuly dástúrli Islamnyń jeke bir din emes ekenin, onyń Paıǵambarymyz Muhammedtiń (Oǵan Allanyń salaýaty men sálemi bolsyn) súnnetine, sahabalar ustanǵan jolǵa jáne Áhlý súnnet ýál-jamaǵat baǵytyna negizdeletinin túsindirdi.

«Qazaq dalasynda Islam ǵasyrlar boıy osy jolmen ornyqty. Senim máselesinde Imam Matýrıdıdiń aqıda mektebi, amal-qulshylyq máselesinde Imam Aǵzam Ábý Hanıfa mázhaby negizge alyndy. Sondyqtan búgingi mindetimiz – dindi durys túsiný», – dedi bas ımam.

Sondaı-aq, din máselesinde bilimniń mańyzyna erekshe toqtalyp, Qurandy, hadısti, fıqh pen aqıda ilimderin arnaıy ǵylymı ádistemeler jáne din mamandary arqyly túsiný qajettigin jetkizdi.

Ýaǵyzdan soń bas ımam quptan namazyn júrgizip, el amandyǵy men tynyshtyǵyn, halyqtyń yntymaǵy men jamaǵattyń aýyzbirshiligin tilep, duǵa jasady.

Источник: Aisha