BAS IMAM QOǴAMDYQ KEŃES MÚShELERIMEN ÓTKEN JIYNǴA QATYSTY

QMDB Astana qalasy ókildiginiń uıymdastyrýymen Astana qalasynyń Qoǵamdyq keńesi jáne Ardagerler keńesi músheleri, aqsaqaldarmen «Qudaıy as – jarys emes, saýap» jáne «Toı – tárbıe men taǵylymnyń ordasy» taqyryptarynda kezdesý ótti. Basqosýǵa Astana qalasynyń bas ımamy Nurbek qajy Áýeshanuly arnaıy qatysyp, din men dástúr sabaqtastyǵy, as berý mádenıeti jáne toı ótkizý ádebi jóninde nasıhat aıtty.

Kezdesýde Qazaqstan musylmandary dinı basqarmasy bekitken «As berý mádenıeti» qujaty tanystyryldy. Bas ımam qujattyń negizgi maqsaty – halyq arasyndaǵy ysyrapshyldyqtyń aldyn alý, janaza men qudaıy as berý rásimderin birizdilikke túsirý jáne dástúrdiń bastapqy mánin saqtaý ekenin atap ótti.

«Qudaıy as – jarysatyn oryn emes, izgilik pen taǵylym toǵysatyn orta. Onyń baǵasy jaıylǵan dastarqanmen emes, kórsetilgen qurmetpen, jasalǵan duǵamen jáne muqtajǵa tıgen kómegimen ólshenýge tıis. Qaraly úıdiń qaıǵysyn jeńildetýdiń ornyna, artyq shyǵynǵa batyrýǵa bolmaıdy. Sondyqtan as bergende dastarqannyń sánine emes, duǵanyń shynaıylyǵyna, jınalǵan jurttyń yntymaǵyna mán bergen jón. Sizder elge sózi ótetin aqsaqaldar retinde osy bastamany qoldap, qarapaıymdylyq pen únemshildikti nasıhattasańyzdar deımiz», – dedi Nurbek qajy Áýeshanuly.

Kezdesýde toı mádenıeti de nazardan tys qalmady. Nurbek qajy Áýeshanuly ulttyq salt-dástúrge qaıshy keletin áreketterdiń aldyn alyp, toıdyń tárbıelik mánin saqtaýdyń mańyzyn aıtty. Aqsaqaldardy jastarǵa ónege kórsetip, ulttyq qundylyqtardy dáripteýge jáne qoǵamǵa paıdaly bastamalarǵa ún qosýǵa shaqyrdy. Aqsaqaldar da óz kezeginde taǵylymdy oılaryn ortaǵa salyp, ıgi bastamaǵa ún qosty.

Jıyn sońynda izgi tilekter aıtylyp, eldiń amandyǵy men jurttyń tynyshtyǵyna duǵa jasaldy.

Источник: Aisha