Bas meshit shákirtterine sertıfıkat tabystaldy (FOTO)
Búgin Astana qalasyndaǵy respýblıkalyq «Áziret Sultan» meshitinde oqý jylynyń aıaqtalýyna oraı «Dinı saýat ashý kýrsynyń» shákirtterine sertıfıkat tabystaý rásimi bolyp ótti. Shara shymyldyǵyn ashqan QMDB tóraǵasynyń birinshi orynbasary, «Áziret Sultan» meshitiniń bas ımamy Naýryzbaı qajy Taǵanuly jıylǵan jamaǵatty qasıetti juma kúnimen quttyqtap ótip, bilim úırenýdiń mańyzdylyǵyna toqtaldy. «Tal besikten jer besikke deıin ilim izde» degen Paıǵambar (s.ǵ.s.) ósıetine saı asyl ýaqyttaryn bosqa jumsamaı, árbir árpi saýapqa tunǵan qasıetti Quran jattaýǵa arnaǵan shákirtter qaýymyna óz alǵysyn bildirip, jyly lebizin jetkizdi.
Elbasymyz N.Á.Nazarbaevtyń «bul meshit qulshylyq orny ǵana emes, bilim-ǵylymnyń, mádenıettiń ordasy bolýy tıis» degen sózine búgingi tańda tolyǵymen saı kelip turǵan «Áziret Sultan» meshitindegi bilim berý júıesi jaıly tanystyryp, jalpy maǵlumat berip ótken Naýryzbaı qajy Taǵanuly ustazdar qaýymyna da shynaıy rızashylyǵyn bildirip, arnaıy «Alǵys hatpen» marapattady.
Sondaı-aq, bıylǵy jyly Naýryzbaı qajy Taǵanulynyń bastamasymen alǵash ret ustazdar qaýymy arasynda úzdik nátıje kórsetip, eń kóp shákirt tárbıelegen meshit qyzmetkerine «Úzdik ustaz» ataǵyn berilip, yntalandyrý maqsatynda arnaıy «Dıplom» tabys etildi. Tuńǵysh ret berilip otyrǵan «Úzdik ustaz» ataǵy naıb ımam Ǵazız Ahmetke buıyrdy.
Bıylǵy jyly dinı saýat ashý kýrsynyń oqý baǵdarlamasyn támamdaǵan 361 shákirtke búgin arnaıy meshit sertıfıkaty tapsyryldy. Olardyń 218-i er shákirtter bolsa, aqjaýlyqtylar 143 jan dinı saýatyn ashqan. Shákirtter oqý jyly aıasynda «Quran álippesin» támamdap, sondaı-aq, «Ǵıbadat» jáne «Aqıda» sabaqtary boıynsha da bilim alyp shyqqan.
Budan bólek, meshit basshylyǵynyń uıymdastyrýymen shákirtter arasynda túrli bilim jarystary, sporttyq oıyndar men ujymdyq serýender uıymdastyrylyp, yntymaq pen birlikke uıysqan jamaǵat qalyptastyrý jolynda irgeli ister atqarylyp keledi. Sonyń biri retinde meshit shákirtteri arasynda turaqty túrde ótkizilip kele jatqan «Quran jarysyn» erekshe aıtsaq bolady. Meshit shákirtterinen quralǵan «Sultan» komandasynyń bıylǵy jyly «Salaýatty jamaǵat» V qalalyq sporttyq oıyndar jarysynda jeńimpaz atanyp, top jarǵany da – bir úıdiń balasyna aınaldyrǵan birlik pen yntymaqtyń nátıjesi ekeni sózsiz.
