Bas meshit jamaǵaty juma kúni taǵy bir saýapty is jasady (FOTO)

Búgin, qasıetti juma kúni respýblıkalyq «Áziret Sultan» meshitinde «Ózgege ómir syıla!» atty donorlyq aktsııa bolyp ótti. Tańǵy toǵyzdan bastap qulshylyq ordasynyń aýlasynda ornalasqan Respýblıkalyq qan ortalyǵynyń kóligi eriktiler qabyldap, óz jumystaryn bastap ketti.

Respýblıkalyq Qan ortalyǵymen birlesip uıymdastyrylǵan ıgi sharaǵa meshit qyzmetkerleri de belsene atsalysyp, kezektiń aldy bolyp qan tapsyryp qaıtty. Toqsan saıyn turaqty túrde ótkizilip turatyn bul aktsııa meshit jamaǵatyna kópten tanys. Óz isterine tyndyrymdy qan ortalyǵynyń qyzmetkerleri de bul jerdiń «qany kóp» jandaryn burynnan tanıdy. «Kóbisi buryndary qan tapsyrǵan bolatyn. Túrleri tanys, keıbiriniń tipti esimderin de bilemiz», - deıdi ortalyq qyzmetkerleri.