Bas meshitte alǵashqy taraýıh namazy oqyldy (FOTO)
Isi musylman qaýymy saǵyna kútken qasıetti Ramazan aıy da bastaldy. Berekeli aıda Alla razylyǵynan úmit etken musylman qaýymy búgin qulshylyq ordalaryna jınalyp, taraýıh namazdary da bastalyp ketti. Saýaby sansyz múbárak aıdy meılinshe paıdaly ótkizýdi josparlaǵan elimizdiń barlyq qulshylyq ordalary bul kúnge daıyndyqtaryn erte bastan pysyqtap, qapysyz qamdanyp ta qoıǵan bolatyn. Jamaǵat jaǵy da qasıetti aımen qaýyshar sátke erekshe daıyndyqpen, aıryqsha yqylaspen aıaq basyp, kesh túsisimen qulshylyq ordasyna qaraı aǵyla bastady.
Jamaǵattyń osyndaı ystyq yqylasy men yntasy Astana qalasyndaǵy respýblıkalyq «Áziret Sultan» meshitinde aıryqsha baıqaldy. Quptan namazynyń azany shaqyrylmaı jatyp meshit ishi ıin tiresken jamaǵatqa lyq tolyp, bir-birin Ramazannyń bastalýymen quttyqtaǵan tilekter tıegi aǵytyldy. Bas meshit jamaǵatymen Ramazan aıyn qarsy alýǵa QMDB tóraǵasy, Bas múftı Serikbaı qajy Satybaldyuly da kelip, múbárak keshtiń mańyzyn arttyra tústi. Quptan namazynan soń Serikbaı qajy Oraz jamaǵatqa taǵylymdy ýaǵyz aıtyp, Ramazan aıynyń qadir-qasıeti jaıynda maǵlumat berip ótti.
Sondaı-aq, Bas múftı qasıetti Ramazan aıy boıy respýblıkalyq «Áziret Sultan» meshitinde Quran kárimdi hatym etip, taraýıh namazdarynda ımamdyqqa shyǵatyn qarılardy tanystyryp ótti. Bıylǵy jyly elimizdiń Bas meshitinde taraýıh namazdaryn «Áziret Sultan» meshitiniń naıb ımamy Ǵazız Ahmet jáne jas qarılar Murtaza Ertaıuly men Ýálıev Shoqan ótkizetin bolady.
«Áziret Sultan» meshitiniń naıb ımamy Ǵazız Ahmet esimi bul kúnde elimizdegi jamaǵatqa keńinen tanys. Din jolyndaǵy alǵashqy qyzmetin 2010 jyly Astana qalasyndaǵy Islam ortalyǵynda ustazdyqtan bastaǵan Ǵazız Ahmet elimizdegi birneshe meshitte bas ımamdyq qyzmet atqaryp, 2015 jyly Taraz qalasynyń bas ımamdyǵyna taǵaıyndalǵan bolatyn. Qazirgi ýaqytta resýpblıkalyq «Áziret Sultan» meshitiniń naıb ımam qyzmetinde.
Bas meshittegi taraýıh namazdaryna ımamdyq etýge bıylǵy jyly alǵash shaqyrylyp otyrǵan Ýálıev Shoqan – «Nur Múbárak» Egıpet Islam mádenıeti ýnıversıtetiniń túlegi. Qazirgi tańda Lıvan respýblıkasynda «Trıpolı» ýnıversıtetinde bilim alyp jatyr. Jas qarı 2016 jyly Túrkııada ótken Halyqaralyq Quran jarysynda elimizdiń namysyn qorǵap, II oryn ıelengen bolatyn.
Balahmet Murtaza Ertaıuly – Astana qalasyndaǵy Respýblıkalyq Qarılar daıyndaý ortalyǵynyń túlegi. Malaızııa jáne Indonezııa elderinde ótken Halyqaralyq Quran jarystaryna qatysqan.
