Bas meshittiń bala shákirtteri Ulttyq mýzeıge saıahat jasady (FOTO)

Búgin Astana qalasyndaǵy respýblıkalyq «Áziret Sultan» meshitiniń jazǵy saýat ashý kýrsynyń bala shákirtteri elimizdiń Ulttyq mýzeıine saıahat jasap qaıtty. Mamyr aıynyń 28-juldyzynda bastalǵan jazǵy saýat ashý kýrsy baǵdarlamasynyń jarym belinen asqan bala shákirtterdiń tanym kókjıekterin keńeıtip, elimizdiń tarıhyn tanı túsýi úshin uıymdastyrylǵan bul saıahat rasymen de oljaǵa toly boldy.

Elorda tórindegi Ulttyq mýzeı qyzmetkerleri de bala qonaqtardy qushaq jaıa qarsy alyp, elimizdiń qundy tarıhy men jetistikterin jipke tizgendeı ǵyp baıandap, sábı kóńilderge ulttyq qundylyqtarymyzdy sińire bildi. Qazdyń balapandaryndaı shúpirlegen bala shákirtterdiń túrli suraqtary da tanystyrýshy mamandardyń tushymdy jaýaptaryna jalǵasyp, Ulttyq mýzeıdegi árbir jádigerdiń tarıhy tarqatyldy.

Aıta keteıik, respýblıkalyq «Áziret Sultan» meshitindegi jazǵy saýat ashý kýrsyna bıylǵy jyly 300-ge jýyq oqýshy qabyldanǵan bolatyn. 7 men 15 jas aralyǵyndaǵy jetkinshekter bir aıǵa sozylatyn jazǵy kýrs aıasynda «Quran álippesi» jáne «Imandylyq álippesi», «Duǵa» jáne «Ádep» sabaqatary boıynsha dáris alyp, dinı saýat ashyp shyǵatyn bolady. Sondaı-aq, oqýyshlardy yntalandyra túsý maqsatynda osyndaı tanymdyq saıahattarmen qatar, túrli bilim jarystary jáne sýret saıystary ótkiziletin bolady.