BAS MÚFTI ALǴAShQY TARAÝYQ NAMAZYNDA NASIHAT AITTY
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Astana qalasyndaǵy Respýblıkalyq bas meshitte qasıetti Ramazan aıynyń alǵashqy taraýyq namazyna qatysyp, jamaǵatqa ýaǵyz aıtty.
«Qadirmendi jamaǵat! Búgin minekeı qasıetti Ramazan aıymen qaýyshyp, Alla qalasa eń alǵashqy taraýyq namazymyzdy oqyǵaly turmyz. Erteń Alla qalasa Ramazannyń alǵashqy kúniniń orazasyn tutamyz. Alla Taǵala qasıetti Qurannyń «Baqara» súresi, 185-aıatynda: «Ramazan aıy sondaı bir aı, ol aıda adam balasyna týra jol jáne (aq pen qarany) aıyratyn dálel túrinde Quran túsirildi. Senderden kim ramazan aıynda bolsa, oraza ustasyn», – dep aıtqan.
Osy aıat qasıetti Ramazanda Quran túskenine jáne de Ramazan aıynda oraza tutý paryz ekenine dálel. Óıtkeni Alla Taǵala: «Senderden kim ramazan aıynda bolsa, oraza ustasyn», – dep aıtty.
Ramazan sózi «ár-Ramdá-ý» sózinen shyǵady. Bul sóz óte ystyqtan kúıdirilgen tasqa qatysty qoldanylady. Ramazannyń bulaı dep atalýynyń negizgi eki sebebi bar:
Birinshi: Bul ataý adamdardyń tastar qatty qyzatyn ystyq kezde oraza ustaýyn sıpattaıdy.
Ekinshi: Ramazanda oraza ustaý arqyly adamdardyń kúnási kúıdirilip, joq bolyp, keshiriletinin sıpattaıdy. Ybyraı Altynsarın babamyz «Musylmanshylyqtyń tutqasy» atty eńbeginde: «Ár jyl ramazan aıynda otyz kún rýza tutý paryz. Ramazan degen sóz «kúıdirgen» degen maǵynada. Iaǵnı ramazan aıynda rýza ustaǵandardyń kúnási kúıdiriledi», – degen» dedi Bas múftı.
Sondaı-aq QMDB Tóraǵasy jamaǵatqa taraýyq namazyn ótkizetin qarılardy tanystyryp, ıgi nıetin jetkizdi jáne elimizdiń ıgiligi úshin arnaıy duǵa jasady.
