BAS MÚFTI ALMATY OBLYSY ÁKIMIMEN KEZDESTI (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qonaev qalasynda Almaty oblysynyń ákimi Marat Sultanǵazıevpen kezdesti.
Kezdesýde óńirdegi dinı ahýal talqylandy. Sonymen qatar, ımamdardyń bilimi men biliktiligin kóterý, din qyzmetkerlerin áleýmettik turǵydan qoldaý, aımaqtaǵy meshitterdi kadrlarmen qamtamasyz etý, halyqqa din men dástúr sabaqtastyǵyn dáripteý, jastardy destrýktıvti dinı aǵymdardyń ıdeologııasynan saqtandyrý t.b. máseleler sóz boldy.
«Memleket basshysy Qasym-Jomart Toqaevtyń halqymyzdyń birtýar tulǵasy, memleket jáne qoǵam qaıratkeri Dinmuhamed Qonaev esimin jańa oblys ortalyǵyndaǵy qalaǵa berý týraly bastamasy bizdiń dinı saladaǵy jumysymyzǵa oń serpin berýde. Qonaev qalasynan Dinı basqarma ókildigin ashtyq», – dedi Naýryzbaı qajy Taǵanuly.
Kezdesýde QMDB Tóraǵasy oblys basshysyna ıgi nıetin jetkizip, jańa qyzmetine bereke tiledi. Basqosý sońynda taraptar ortaq jobalardy júzege asyrýǵa ýaǵdalasty.
