Bas múftı Aqsaqaldar forýmynda baıandama jasady (FOTO)
Elordada Qazaqstan musylmandary dinı basqarmasynyń uıymdastyrýymen ótip jatqan «Qarııalar – el qazynasy» I respýblıkalyq aqsaqaldar forýmynda Bas múftı Naýryzbaı qajy Taǵanuly baıandama jasady.
QMDB Tóraǵasy qarııalardyń qazaq qoǵamyndaǵy orny mańyzdy ekenin atap ótip, adasqandy jónge salatyn aqsaqaldar ınstıtýtynyń qajettigin tilge tıek etti.
«Keshegi qańtar qasireti kezinde elge toqtaý aıtyp, jalań uranmen kóshege shyqqan jastardy jónge shaqyratyn úlkenniń pátýaly sózi qoǵam úshin aýadaı qajet bolǵany aıqyn sezildi.
Men jyl basynda elimizdegi barsha din qyzmetkerlerine baǵdarlyq baıandamamdy joldadym. Baǵdarlyq baıandamamda Qazaqstan musylmandary dinı basqarmasy janynan Aqsaqaldar keńesin qurý týraly bastama kóterdim.
Allaǵa shúkir, ıgi bastamanyń aıasynda Dinı basqarma janynan Aqsaqaldar keńesi quryldy. Jýyrda osy keńestiń alǵashqy basqosýyn ótkizdik. Keńeske múshe bolǵan memleket jáne qoǵam qaıratkerleri, zııaly qaýym ókilderi, ardager ımam-ustazdar parasatty pikirlerin ortaǵa salyp, ortaq kelisimge keldik», – dedi Bas múftı Naýryzbaı qajy Taǵanuly.
