BAS MÚFTI AQTÓBE OBLYSYNDA
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly jumys saparymen Aqtóbe oblysyna bardy. Bas múftı jumys saparyn Aqtóbe qalasyndaǵy ortalyq «Nur Ǵasyr» meshitiniń jamaǵatymen júzdesýden bastady.
Quptan namazyna jınalǵan jamaǵatpen júzdesýde Bas múftı musylman adam jasaıtyn ǵıbadat-qulshylyǵynyń, oqıtyn namazynyń qadir-qasıetin túsinip, oryndaý barysynda rýhanı lázzat alýy úshin qajetti sıpat – hýshýǵ jóninde ýaǵyz-nasıhat aıtty.
Hýshýǵ – musylmannyń ǵıbadat-qulshylyǵyna jan bitirip, ony erekshe rýhanı lázzatpen oryndaýyna, aqyrette esepsiz saýapqa kenelýine sebepshi bolady. Namazynda hýshýǵ tanytýshy Alla Taǵalanyń kórip turǵanyn sezinip, Onymen tikeleı tildesip turǵandaı kúıde bolady. Bir namazdan keıin ekinshi namazdy saǵynyp turady. Sondyqtan da Alla Taǵala qasıetti Quranda: «Sabyr jáne namazben járdem tileńder. Rasynda namaz hýshýǵ tanytýshylardan basqalarǵa aýyr keledi» , – degen. «Kábırat-ýn» (كبيرة) sózi «qıyn, aýyr» degen maǵynalardy bildiredi. Aıatta namazdy hýshýǵsyz oqýshylar úshin ol aýyr bolatyny aıtylý arqyly hýshýǵtyń ǵıbadattaǵy mańyzy meńzelýde. Keıbir ǵalymdar bul aıatta namazdaǵy hýshýǵtyń mindettiligi baıandalyp turǵanyn aıtqan», – dedi Naýryzbaı qajy Taǵanuly.
Bas múftı ýaǵyz-nasıhattan soń meshit jamaǵatymen birge quptan namazyna qatysyp, el amandyǵy úshin arnaıy duǵa jasady.
