Bas múftı Astanadan attanǵan qajylarǵa aq jol tiledi (FOTO)

Búgin Qazaqstan musylmandary dinı basqarmasynyń tóraǵasy Serikbaı qajy Oraz astanalyq qajylardy uly saparǵa shyǵaryp salý rásimine qatysty.

Saltanatty sharaǵa Saýd Arabııasy Koroldiginiń Qazaqstandaǵy elshisi Zahır ben Mýtısh Ál-Enazı myrza da qatysyp, qazaqstandyq qajylarǵa sət sapar tiledi.

"Qajylyqtyń ózine tən qıyndyqtary men synaqtary bolady. Áýejaıdan bastap, elge qaıtyp kelgenshe túrli mashaqatty bastan ótkeremiz. Sondyqtan ər synaqty sabyrmen qabyldap, tózimdilik tanytýymyz tıis. Óıtkeni, sizder Allanyń jolynda saparǵa nıettenip, qajylyq óteýge bel býdyńyzdar. Alla barshańyzǵa qabyl bolǵan qajylyqty nəsip etkeı. Əmın", - dedi Bas múftı Serikbaı qajy Oraz.

Óz kezeginde Saýd Arabııasy Koroldiginiń Qazaqstandaǵy elshisi Zahır ben Mýtısh Ál-Enazı myrza qajylarǵa izgi nıetin jetkizip, jyly lebizin bildirdi.

Aıta keteıik, búgin Astanadaǵy Nursultan Nazarbaev halyqaralyq áýejaıynan 145 qajy Astana-Jıdda baǵyty boıynsha uly saparǵa attandy.