Bas múftı «Áziret Sultan» meshitindegi alǵashqy taraýıh namazyna qatysty (FOTO)

05 mamyr 2019 8728 0
Оqý rejımi

Mamyr aıynyń búgingi mamyrajaı keshinde esigimizden qasıetti Ramazan aıy enip, Uly dala tósindegi qulshylyq ordalary taraýıh namazdarymen ásemdene tústi. Ymyrt úıirilisimen-aq meshit ishin lyq toltyrǵan jamaǵattyń kóptigi – halqymyzdyń qasıetti Ramazanǵa degen saǵynyshtarynyń aıqyn belgisindeı boldy. Taraýıh namazyna qatysyp, Ramazan aıyndaǵy alǵashqy saýapty amaldy atqarýǵa tyrysqandardyń kóptigi sonsha – kóptegen meshitterdiń aýlasy da sap túzegen musylmandarǵa tolyp, ashyq aspan astynda qulshylyqtaryn ótedi.

Jamaǵattyń osyndaı ystyq yqylasy men yntasy Nur-Sultan qalasyndaǵy respýblıkalyq «Áziret Sultan» meshitinde aıryqsha baıqaldy. Quptan namazynyń azany shaqyrylmaı jatyp meshit ishi ıin tiresken jamaǵatqa lyq tolyp, bir-birin Ramazannyń bastalýymen quttyqtaǵan tilekter tıegi aǵytyldy. Bas meshit jamaǵatymen Ramazan aıyn qarsy alýǵa QMDB tóraǵasy, Bas múftı Serikbaı qajy Satybaldyuly da kelip, múbárak keshtiń mańyzyn arttyra tústi. Taraýıh namazy aldynda Bas múftı jamaǵatqa taǵylymdy ýaǵyz aıtyp, Ramazan aıynyń qadir-qasıeti jaıynda maǵlumat berip ótti.

Sondaı-aq, Bas múftı qasıetti Ramazan aıy boıy respýblıkalyq «Áziret Sultan» meshitinde Quran kárimdi hatym etip, taraýıh namazdarynda ımamdyqqa shyǵatyn qarılardy tanystyryp ótti. Bıylǵy jyly elimizdiń Bas meshitinde taraýıh namazdaryn «Áziret Sultan» meshitiniń naıb ımamy Jumanazar Óserhanuly, Almaty Ortalyq meshitiniń naıb ımamy, QMDB Ǵulamalar Keńesiniń múshesi Ersin Ámire jáne jas qarı Murtaza Ertaıuly ótkizetin bolady.

Aıta keteıik, QMDB tóraǵasynyń birinshi orynbasary, naıb múftı, Nur-Sultan qalasynyń Bas ımamy Naýryzbaı qajy Taǵanulynyń bastamasymen bıylǵy Ramazan aıynda Elordamyzdaǵy 10 meshitte aıtylatyn taraýıh ýaǵyzdary birizdilikke keltirilip, barlyq qulshylyq ordasynda kúndelikti namaz aldynda Quran súreleriniń tápsirleri baıandalyp otyrady.

Sondaı-aq, bıylǵy jyly da taraýıh namazdarynan soń jamaǵatty tasymaldaý úshin Nur-Sultan ákimdiginiń qoldaýymen Elordamyzdaǵy 5 meshitke tegin avtobýs bólinip otyr. Avtobýstardyń qandaı baǵytpen júretinin myna siltemeden tolyǵyraq bile alasyzdar!

Sýretter toptamasyn «FOTOGALEREIa» aıdarynan kórýge bolady!

Pіkіrler Kіrý