BAS MÚFTI BAS JÚLDE IELENGEN QARIǴA AVTOKÓLIK KILTIN TABYSTADY

06 qyrkúıek 2026 480 0 Оqý rejımi

Búgin Aqtóbe qalasyndaǵy «Nur Ǵasyr» meshitinde Qazaqstan musylmandary dinı basqarmasynyń uıymdastyrýymen Quran Kárimdi jatqa jáne mánerlep oqýdan HV respýblıkalyq baıqaýy máresine jetti.

80 úmitker qatysqan baıqaýdyń jeńimpazdary men júldegerlerin marapattaý rásimine QMDB Tóraǵasy, Bas múftı Naýryzbaı qajy Taǵanuly, saýapty is-sharaǵa demeýshilik jasaǵan Baharıdın Ablazımov, zııaly qaýym ókilderi men qala turǵyndary qatysty.

Qarılardy marapattaý rásiminde Bas múftı Naýryzbaı qajy Taǵanuly: «Eki kún boıy Aqtóbe tórinde Qurannyń úni qalyqtap, elimizdiń ár óńirinen kelgen qarılar qasıetti kitapqa degen qurmetin, bilimin, jattaý qabileti men oqý sheberligin kórsetti. Bul jaı ǵana baıqaý emes.

Bul – Quranǵa degen qurmettiń merekesi, ustaz eńbeginiń jemisi. Ata-ana tárbıesiniń kórinisi. Jastardyń rýhanı izdenisiniń aıǵaǵy. Eń bastysy bul basqosý elimizde Qurandy jattaıtyn, ony oqyp qana qoımaı, maǵynasyn túsinýge jáne taǵylymyn ómirine arqaý etýge umtylatyn jas býynnyń ósip kele jatqanyn kórsetti.

Bul baıqaýda tek júlde alǵandar ǵana jeńiske jetken joq. Quran úshin jol júrip kelgen árbir qatysýshy – jeńimpaz. Kún saıyn Quran jattaýǵa ýaqyt bólgen shákirt – jeńimpaz. Balasyna Quran úıretýge jaǵdaı jasaǵan ata-ana – jeńimpaz. Shákirtiniń árbir árpin túzep, árbir súresin tyńdaǵan ustaz – jeńimpaz. Sebebi Quran jolyndaǵy eń úlken jeńis – Allanyń razylyǵyna umtylý. Qasıetti Qurannyń sharapaty barshamyzǵa jaýsyn!» – dedi.

Bas múftı óz sózinde osymen on besinshi ret ótken Quran baıqaýyn uıymdastyrýshy múftııat qyzmetkerlerine, Aqtóbe oblysynyń ımamdaryna, ádil baǵasyn bergen ádilqazy múshelerine alǵysyn jetkizdi. Sonymen qatar saýapty is-sharanyń bas demeýshisi, asyl dinimizdiń janashyry Ablazımov Baharıdın Nuǵmanulyna taǵy da aıryqsha alǵysyn bildirdi.

Sonymen qazylar alqasynyń sheshimimen 4 atalym boıynsha jeńis tuǵyrynan kóringen qarılardyń tizimi tómendegideı:

Tolyq Qurandy jatqa oqýdan:
1-oryn Avtokólik - Rahymjan Erjanuly (Mańǵystaý oblysy)
2-oryn (5 000 000 tg.) - Ahmad Mahmadradjabuly (Ulytaý oblysy)
3-oryn (4 000 000 tg.) - Nurtileý Serikuly (Qyzylorda oblysy)
4-oryn (2 000 000 tg.) - Bekzat Dýlatuly (Aqtóbe oblysy)
5-oryn (1 500 000 tg.) - Mansurhan Sarvarhanuly (Qaraǵandy oblysy)

Qurannyń 20 parasyn jatqa oqý boıynsha:
1-oryn (3 000 000 tg.) - Aıqyn Aqylbekuly (Astana qalasy)
2-oryn (2 000 000 tg.) - Nurıslam Farhaduly (Almaty qalasy)
3-oryn (1 500 000 tg.) - Rahımáli Hojanııazuly (Shymkent qalasy)
4-oryn (800 000 tg.) - Muhammad Hamzaáliuly (Qostanaı oblysy)
5-oryn (500 000 tg.) - Mahmut Joldasuly (Shyǵys Qazaqstan oblysy)

Qurannyń 10 parasyn jatqa oqý boıynsha:
1-oryn (1 500 000 tg.) - Muhammad-Iýsýf Nurasyluly (Almaty oblysy)
2-oryn (1 000 000 tg.) - Omar Mahambetuly (Batys Qazaqstan oblysy)
3-oryn (750 000 tg.) - Bilál Nádiruly (Pavlodar oblysy)

Qurandy mánerlep oqý boıynsha:
1-oryn (700 000 tg.) - Nurmurat Abdýlla (Pavlodar oblysy)
2-oryn (500 000 tg.) - Musabek Mádeliuly (Batys Qazaqstan oblysy)
3-oryn (300 000 tg.) - Habıbýlla Ismahanuly (Túrkistan oblysy)

Sondaı-aq, 10 para boıynsha saıysqa túsken eń jas qarılar Ahmet Nurlanuly (ShQO, 9 jasta) men Ábdilázız Ábdýlbasıt (Qaraǵandy oblysy, 9 jasta) «Kórermen kózaıymy» nomınatsııasymen (300 000 teńgeden) marapattaldy.

Jarysqa qatysyp, júlde almaǵan úmitkerlerdiń árqaısyna 80 000 teńgeden berildi.

Eske sala keteıik, eki kúnge sozylǵan Quran baıqaýyn «Múftııat QMDB» YouTube-arnasynan jáne «MUNARA TV» telearnasynan onlaın kórsetildi.