Bas múftı Býrabaıda jańa meshittiń ashylýyna qatysty (FOTO)

Býrabaı baýraıynda osy zamanǵy sáýlet ónerimen salynǵan eńseli meshit ashyldy. Aıtýly oqıǵaǵa Qazaqstan musylmandary dinı basqarmasynyń tóraǵasy, Bas múftı Serikbaı Oraz haziret arnaıy qatysyp, musylman qaýymǵa óziniń aqjarma tilegin arnady.

Aqmola oblysynyń ákimi Málik Myrzalın meshit salý asa taǵylymdy is ekenin atap kórsetti.

"Osy Býrabaı jerinde azattyqty ańsaǵan alashtyń alyptary, handary men batyrlary bas qosyp, eldik máselelerdi baıyppen sheshken. Búgingi táýelsizdik alǵan kezde birligimiz ben yntymaǵymyzdyń myzǵymas beriktigin pash etetin ulyq isterdiń jarasym tabýy jaqsylyqtyń nyshany. Imandylyq úıi – meshittiń óziniń qaıtalanbas sıpatymen salynǵan, sáýlet óneriniń erekshe týyndysy retinde boı kótergen qýanyshy saýaby mol iske jatady", – dedi Bas múftı Serikbaı Oraz óziniń quttyqtaý sózinde.

Bas múftı el aldynda ǵıbratty ýaǵyz aıtyp, juma namazy oqyldy.

Osy meshitti salǵan «BI GROUP» qurylys korporatsııasynyń bas dırektory Jambyl Jetpisbaevtyń aıtýynsha, júz elý oryndyq ǵımarattyń jalpy alańy 1659 sharshy metrdi quraıdy eken. Munda meshitke tán barlyq qulshylyq oryndary, kitaphana, bilim berý oryndary bar.

Meshitti salýǵa tapsyrys berýshi – Qazaqstan Respýblıkasy Prezıdenti Is basqarmasynyń «Kásipkerlik bastamalardy qoldaý» qory bolyp tabylady. Bir atap óterligi, dinı ǵımarat osy zamanǵy sáýlet ónerimen salynyp, barlyq ınjenerlik jelileri, syrtqy bet beınesi jańa zaman tehnologııasymen jabdyqtalǵan. Qurylysqa paıdalanylǵan ónimder de Ekologııalyq taza shıkizattar.