BAS MÚFTI: DINI QYZMET – ÚLKEN AMANAT ÁRI JAÝAPKERShILIK
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly «Jas maman, aýylǵa qadam bas, maman!» sharasy aıasynda 2025–2026 oqý jylynyń túlekterine nasıhat aıtty.
«Búgingi basqosýdyń mańyzy erekshe.Óıtkeni sizder qyzmettik joldama alýmen qatar úlken amanatty arqalap otyrsyzdar. Meshitte qyzmet etý – úlken amanat, jaýapkershilik ári saýaby molmindet. Qasıetti Quranda: «Rasynda, Alla senderge amanattardy óz ıelerine tapsyrýdy buıyrady» («Nısa» súresi, 58-aıat), – delingen.
Osy aıattaǵy amanat uǵymy din qyzmetkeri úshin aıryqsha mánge ıe.Sebebi ımam halyqqa dindi túsindiredi, meshittiń berekesin arttyrady, jamaǵatty jaqsylyqqa úndeıdi, jastarǵa baǵyt beredi, shańyraq kótergen jandarǵa otbasylyq aqyl-keńes aıtady, halyqtyń qaıǵysyna ortaqtasyp, qýanyshyna tilekshi bolady.
Din qyzmetkeriniń árbir sózi men isi jamaǵatqa áser etedi. Sondyqtan dinı qyzmetke kelgen jas maman eń aldymen óziniń qandaı úlken amanatty arqalap júrgenin sezinýi kerek. Óıtkeni dinı qyzmet jasaý – paıǵambarlar mindetin atqarý degen sóz.
Dinı qyzmettiń eń úlken ereksheligi – onyń rýhanı mıssııasynyń joǵary bolýynda. Ustazdyń sózi men isi adamnyń eki dúnıedegi taǵdyryna áser etedi. Alla Taǵala ardaqty Paıǵambarymyzǵa (oǵan Allanyń salaýaty men sálemi bolsyn) adamzatqa aqıqat joldy jetkizý mindetin júktedi. Sol úshin Paıǵambarymyz (oǵan Allanyń salaýaty men sálemi bolsyn) sahabalaryna bilim berdi, olardy tárbıeledi, adamdardy izgilikke shaqyrdy.
Odan keıin bul amanatty ǵalymdar, ustazdar, ımamdar jalǵastyrdy. Jańa dinı qyzmetke taǵaıyndalyp otyrǵan sizder de osy izgi joldyń jalǵastyrýshysy ekendikterińizdi umytpańyzdar. Sondyqtan ımamdyqty, ustazdyqty tek meshitte namaz ótkizý, ýaǵyz aıtý, dáris berý dep túsiný qate pikir. Din qyzmetkeri – tárbıeshi, halyq pen asyl dinimizdiń arasynda altyn kópir bolatyn rýhanı tulǵa.
Ózderińiz jaqsy bilesizder, memleket basshysy qadirli Qasym-Jomart Kemeluly Astanada ótken ımamdar forýmyna joldaǵan quttyqtaý hatynda bylaı degen edi: «Islam – rýhanııatymyzdyń tiregi. Ata dinimiz izgilik pen adamgershilikke, janashyrlyq pen jasampazdyqqa negizdelgen. Osyndaı asyl qundylyqtar qoǵamda turaqtylyq pen tatýlyqty nyǵaıtyp, elimizdi órkendetý isinde aıryqsha ról atqarady. Sondyqtan salt-dástúrimizben tyǵyz sabaqtasqan dástúrli ıslamdy qadirleý óte mańyzdy»,-dedi Bas múftı Naýryzbaı qajy Taǵanuly.
