BAS MÚFTI «DOSTYQ» MEShITINIŃ AShYLÝYNA QATYSTY (FOTO)
Qasıetti juma kúni Almaty oblysynyń Talǵar aýdanyna qarasty Dostyq aýylynda jańa meshit ashyldy. Saltanatty rásimge Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly arnaıy qatysty.
Jomart jandardyń qoldaýymen segiz aı ishinde qurylysy aıaqtalǵan meshitke «Dostyq» ataýy berildi jáne bul – osy aýylda boı kótergen alǵashqy ımandylyq ordasy. Igi shara qasıetti Quran aıattaryn oqýmen bastalyp, Bas múftı el amandyǵy men tynyshtyǵy úshin duǵa jasady. Budan keıin QMDB Tóraǵasy Dostyq aýylynyń turǵyndaryn mereıli sátpen ári kele jatqan Ramazan aıymen quttyqtap, jańa meshitke bereke tiledi.
«Meshit – Allanyń úıi, barsha jaqsylyqtyń toǵysqan qutty mekeni. Meshit búginde qoǵamdaǵy barlyq máseleniń sheshimin tabýǵa, eldegi birliktiń, yntymaqtyń saqtalýyna tikeleı sebepshi bolatyn orynǵa aınaldy. Adamnyń týǵanynan bastap ómirden ótkenge deıingi dinı rásimder meshitte ótkiziledi. Máselen, balaǵa at qoıý, neke qıdyrý, janaza shyǵarý syndy kóptegen dinı rásimder meshitte oryndalady. Sondyqtan Alla úıiniń boı kóterýine tileýlestik bildirgen jamaǵatqa da Alla razy bolsyn» dedi Bas múftı Naýryzbaı qajy Taǵanuly.
Sondaı-aq QMDB Tóraǵasy meshit salýǵa atsalysqan jandarǵa alǵys bildirip, «Ramazan – meıirim aıy» taqyrybynda juma ýaǵyzyn aıtty.
Aıta keteıik, jańa meshit ǵımaraty eki qabattan turady. Erler men áıelderdiń namaz zaly, ımam bólmesi, dárethanasy zamanaýı úlgide salynǵan. Búgin 300 adamǵa arnalǵan meshitte alǵashqy juma namazy oqyldy.
