BAS MÚFTI ELORDALYQ DIN QYZMETKERLERIN MARAPATTADY

Astana qalasyndaǵy «Áziret Sultan» meshitinde elordalyq din qyzmetkerlerin marapattaý rásimi ótti.

Saltanatty jıynda Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Qurban aıt kúnderi halyqqa dinı qyzmet kórsetýde, qaıyrymdylyq sharalaryn uıymdastyrýda jáne qurbandyq rásimderiniń talapqa saı oryndalýyna úles qosqan birqatar azamattarǵa alǵys hat tabystady.

Bas múftı óz sózinde Qurban aıttyń musylman jurtshylyǵy úshin aıryqsha mańyzǵa ıe mereke ekenin atap ótip, mereke kúnderi jaýapkershilikpen qyzmet atqarǵan din qyzmetkerleri men eriktilerge rızashylyǵyn bildirdi. Sondaı-aq olardyń qajyrly eńbegi men uıymshyldyǵynyń arqasynda qaıyrymdylyq sharalary joǵary deńgeıde júzege asyp, kóptegen otbasylar qýanyshqa kenelgenin jetkizdi.

Marapattalǵandardyń qatarynda Qurban aıt is-sharalaryn uıymdastyrýǵa belsene atsalysyp, qoǵamdyq jáne qaıyrymdylyq jumystarǵa úles qosqan azamattar boldy. Olarǵa Qazaqstan musylmandary dinı basqarmasynyń arnaıy alǵys hattary tapsyryldy.

Jıyn sońynda Bas múftı marapat ıelerine aldaǵy qyzmetterine tabys tilep, el ıgiligi jolyndaǵy eńbekterine bereke tiledi.

Aıta keteıik, bıylǵy Qurban aıt merekesi aıasynda elorda meshitterinde qurbandyq shalý rásimderi uıymdastyrylyp, muqtaj otbasylarǵa qaıyrymdylyq kómekter kórsetildi. Bul ıgi sharalarǵa din qyzmetkerleri men eriktiler belsendi qatysyp, merekeniń rýhanı jáne áleýmettik mánin arttyra tústi.

Источник: Aisha