BAS MÚFTI ǴASYRLYQ TARIHY BAR KÓNE MEShITTI ZIIaRAT ETTI (FOTO)

QMDB Tóraǵasy, Bas múftı Naýryzbaı qajy Taǵanuly Abaı oblysy Besqaraǵaı aýdany Aqkól eldimekeninde ornalasqan Aqkól meshitinde bolyp, jamaǵatpen birge namaz oqydy.

Birneshe jyldan qaraýsyz qalǵan tarıhı meshitke jaqynda ǵana kúrdeli jóndeý jumystary júrgizilip, jamaǵatqa esigin ashqan bolatyn. Bas múftı kóne qulshylyq ornynyń búgingi tynysymen tanysyp, qol ushyn sozǵan azamattarǵa alǵysyn bildirdi. Meshitke kelgen jamaǵatqa belgili dintanýshy Abdýlla qajy Joldas bata berip, aq jol tiledi.

Meshit týraly aıtar bolsaq, Aqkól meshiti – 1907 jyly salynǵan tarıhı qundy jádiger. Qulshylyq úıin tatar kópesi Sultan qajy Fazylbekov saldyrǵan. Meshittiń eń basty ereksheligi birde bir shege qaǵylmaı turǵyzylǵan, al irgetasy qyzyl kirpishten qalanǵan.

Erekshe sáýletti ǵımarat 1918 jylǵa deıin meshit qyzmetin atqarǵan. Dinge tyıym salynǵan kezeńde mádenıet úıi, odan mektep, kitaphanaǵa aınalǵan. Táýelsizdik alǵannan keıin ǵana kóne meshit tarıhı-mádenı nysandar tizimine kirip, saqtalyp qalǵan. Alaıda ıesiz turǵan nysan irgesiniń qaraǵaıy syr berip, jóndeý jumystaryn qajetsingen.

Birneshe jyl boıy qaraýsyz qalǵan kóne meshitke 2021 jyly ǵana jergilikti halyqtyń bastamasymen kúrdeli jóndeý jumystary júrgizildi. Búginde jańa keıipke engen meshit halyq ıgiligine paıdalanýǵa berildi.