BAS MÚFTI I RESPÝBLIKALYQ «ÚZDIK IMAM» INTELLEKTÝALDY BILIM SAIYSYNYŃ JEŃIMPAZDARYN MARAPATTADY
Astana qalasyndaǵy «Áziret Sultan» meshitinde Qazaqstan musylmandary dinı basqarmasynyń uıymdastyrýymen ótken I respýblıkalyq «Úzdik ımam» ıntellektýaldy bilim saıysynyń saltanatty marapattaý rásimi ótti.
Marapattaý rásimine arnaıy qatysqan QMDB Tóraǵasy, Bas múftı Naýryzbaı qajy Taǵanuly saıystyń mańyzdylyǵyna toqtalyp, qatysýshylarǵa rızashylyǵyn bildirdi.
«Búginde Qazaqstan musylmandary dinı basqarmasynyń basty mindetiniń biri– din qyzmetkerleriniń biliktiligin úzdiksiz kóterip, el birligine, qoǵam turaqtylyǵyna, otbasy qundylyqtaryna, izgilik pen adamgershilikke úndeıtin saýatty dinı kadrlar daıarlaý. Óıtkeni ımam meshit qyzmetkeri ǵana emes, ol qoǵamnyń rýhanı tiregi, ulttyq tárbıeniń, el tynyshtyǵy men ult birliginiń uıytqysy.
Búgingi bilim saıysy árbir ımamnyń óz áleýetin kórsetip, bilimin shyńdap, tájirıbesin baıytýyna úlken múmkindiktýǵyzdy dep esepteımin. Bilim saıysyna elimizdiń ár oblysynan iriktelip kelgen eń úzdik ımamdar ózderiniń bilimi men parasyn pash etti. Sondyqtan osy saıysqa qatysqan árbir ımam jeńimpaz atandy dep sanaımyn. Alla qalasa, ımamdar arasyndaǵy bul jarys jyl saıyn jańa deńgeıde uıymdastyrylyp, dástúrge aınalady degen senimdemin», – dedi Bas múftı.
Ádilqazylar alqasynyń sheshimimen I respýblıkalyq «Úzdik ımam» ıntellektýaldy bilim saıysynyń jeńimpazdary tómendegideı:
- I oryn: Bekzat Azatbekuly Qusanbaev – ShQO, Óskemen qalalyq ortalyq meshitiniń naıb ımamy (500 myń teńge)
- II oryn: Nurlan Murat – Jambyl oblystyq «Hıbatýlla Taraz» meshitiniń naıb ımamy (400 myń teńge)
- III oryn: Qýanysh Toqsanbaıuly Ábishev – Almaty qalalyq Ortalyq meshitiniń naıb ımamy (300 myń teńge)
Sonymen qatar, jarysqa qatysyp, júldegerler qataryna enbegen ımamdarǵa 50 000 teńgeden yntalandyrý syıaqysy berildi.
