BAS MÚFTI II HALYQARALYQ QURAN JARYSYNYŃ JEŃIMPAZDARYN MARAPATTADY

Astana qalasyndaǵy Respýblıkalyq Bas meshitte II Halyqaralyq Quran jarysynyń saltanatty marapattaý rásimi ótti.

Atalǵan halyqaralyq is-shara Qazaqstan Respýblıkasynyń ulttyq merekesi – Respýblıka kúnine jáne Qazaqstan musylmandary dinı basqarmasynyń 35 jyldyq mereıtoıyna arnaldy.

Marapattaý rásimine Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly, sondaı-aq musylman elderiniń elshileri, zııaly qaýym ókilderi, óńirlerden kelgen ımamdar men qala turǵyndary qatysty.

Óz sózinde Bas múftı Naýryzbaı qajy Taǵanuly halyqaralyq jarystyń mańyzdylyǵyna toqtalyp, qatysýshylarǵa rızashylyǵyn bildirdi.

«Allaǵa shúkir, Astana qalasynda álemniń ár buryshynan, alys ta jaqyn shet elderden kelgen tájirıbeli qarılarymyz eki kún boıy Qurandy jatqa oqýdan synǵa túsip, keremet úlgi kórsetti.

Rasynda Qurannyń maǵynasyna tereń boılaǵan saıyn janyń tynyshtyq taýyp, júregiń erekshe sezimge keneledi. Quran oqyǵan saıyn boıymyzda sabyrlyq, baısaldylyq, qarapaıymdylyq, kez-kelgen kisimen kórkem mámile jasaı alatyn jaqsy minez qalyptasa bastaıdy.

Quran oqylǵan jerge Allanyń berekesi men tynyshtyǵy ornaıdy. Quran oqylǵan jer erekshe nurǵa bólenedi. Eki kún boıy elordamyzda oqylǵan Quran aıattary arqyly elimiz ben jerimiz nurǵa bólendi dep úmittenemin. Alla sony násip etsin», – dedi Bas múftı.

Budan keıin QMDB Tóraǵasy II halyqaralyq Quran jarysyna qazylyq jasaǵan qarı-ustazdar – Osman Shahın (Túrkııa), Nasyr bın Saýd ál-Qasamı (Saýd Arabııasy), Nasrýlla Iskandarov (Qyrǵyzstan), Maher Faramaýı (Mysyr Arab Respýblıkasy) jáne ádilqazylar alqasynyń tóraǵasy Ersin Ámirege alǵys hat tabystady.

Ádilqazylar alqasynyń sheshimimen Quran jarysynyń jeńimpazdary tómendegideı:

I oryn – $20 000 – Fahd ıbn Mýhammad ásh-Shámı (Saýd Arabııasy)
II oryn – $15 000 – Merojıddını Ahmadzoda Ahmad (Tájikstan)
III oryn – $10 000 – Shohan Ýálıev (Qazaqstan)
IV oryn – $5 000 – Salıh Mýhammad Mýsa Tohamı (Mysyr)
IV oryn – $5 000 – Djalıl Nýrýddınov (Reseı)
Kórermen kózaıymy júldesi – $3 000 - Ahmad Ashraf Ýálıd Hamad (Palestına)

Sonymen qatar, jarysqa qatysyp, júldegerler qataryna enbegen qarılarǵa 500 AQSh dollarynan yntalandyrý syıaqysy berildi.

Aıta keteıik, Quran jarysy múftııattyń tól «Munara TV» telearnasynan, «Mýftııat QMDB» YouTube arnasynan tikeleı Efır arqyly kórsetildi.