Bas múftı «Imanı jaz – 2026» jazǵy saýat ashý kýrsynyń ashylýyna qatysty

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly «Áziret Sultan» meshitinde ótken «Imanı jaz – 2026» jazǵy saýat ashý kýrsynyń saltanatty ashylýyna qatysty.

Saltanatty jıynǵa Astana qalasynyń jáne «Áziret Sultan» meshitiniń bas ımamy Nurbek Áýeshanuly bastaǵan meshittiń din qyzmetkerleri, ustazdar, ata-analar jáne kýrsqa qabyldanǵan 10–15 jas aralyǵyndaǵy shákirtter qatysty.

Is-shara barysynda Bas múftı shákirtterge aq batasyn berip, jazǵy demalysty paıdaly ótkizip, bilim men tárbıeni qatar ıgerýdiń mańyzdylyǵyna toqtaldy.

«Imanı jaz – 2026» jazǵy saýat ashý kýrsy – balalardyń dinı bilimin jetildirýmen qatar, ulttyq tárbıe men adamgershilik qasıetterdi qalyptastyrýǵa baǵyttalǵan rýhanı-tanymdyq joba. Jıyrma kúnge josparlanǵan kýrs barysynda shákirtterge Quran álippesi, ımandylyq álippesi, kórkem minez ben ádep qaǵıdalary oqytylady.

Sonymen qatar baǵdarlama aıasynda qazaq halqynyń salt-dástúrleri, úlkendi qurmetteý, kishige izet kórsetý, otansúıgishtik pen ulttyq qundylyqtardy dáripteýge arnalǵan arnaıy tárbıe saǵattary uıymdastyrylady. Osy arqyly din men dástúr sabaqtastyǵyn jas urpaqtyń sanasyna sińirý kózdelgen.

Sýretterdi tolyǵyraq «FOTOGALEREIa» aıdarynan kóre alasyz!

Источник: Aisha