BAS MÚFTI MARQUMDARDYŃ RÝHYNA QURAN HATYM DUǴASYN BAǴYShTADY (FOTO)
Búgin elimizde jarııalanǵan Jalpyulttyq aza tutý kúnine oraı QMDB Tóraǵasy, Bas múftı Naýryzbaı qajy Taǵanulynyń bastamasymen barlyq meshitterde Quran hatym duǵasy jasaldy. Saýapty sharaǵa elimizdiń barlyq óńirlerindegi qulshylyq ordalary da ún qosyp, búgin bir mezette qaıǵyly oqıǵada qaza tapqandardyń rýhyna Quran baǵyshtaldy.
Elorda tórindegi «Áziret Sultan» meshitinde Bas múftı Naýryzbaı qajy Taǵanuly bastaǵan din qyzmetkerleri Quran hatym duǵasyna qatysyp, alapat órt saldarynan qaıtys bolǵan musylmandar rýhyna Quran baǵyshtady. Memleketimizdiń Kókbaıraǵy tómen túsirilip, kúlli Qazaqstan halqy qaıǵyǵa shomǵan azaly kúnde marqumdardardyń artynda qalǵan týystary men jaqyndaryna kórkem sabyr surap, Jaratýshy Alladan jaqsylyq tiledi.
Saýapty sharadan soń tilshiler qaýymyna bergen suhbatynda Bas múftı: «Búgin Jalpyulttyq aza tutý kúninde marqum bolǵan musylman jandardyń rýhyna arnaıy Quran hatym duǵasyn baǵyshtadyq. Alla qabyl etsin! Tilsiz jaýdan qaza tapqan azamattardy Alla meıirimine alǵaı. Qıyn sátte ár azamat birligin tanytyp, óz tarapynan qoldaý kórsetýde. Biz, din qyzmetkerleri de kún saıyn duǵa jasaýdamyz. Sonymen qatar QMDB janyndaǵy «Zeket jáne qaıyrymdylyq» qory apat bolǵan orynda qaıyrymdylyq is-sharalardy júzege asyrýda», – dep atap ótti.
