BAS MÚFTI MEDRESE-KOLLEDJ DIREKTORLARYMEN KEZDESTI (FOTO)
Búgin elordada Bas múftı Naýryzbaı qajy Taǵanuly Qazaqstan musylmandary dinı basqarmasyna qarasty medrese-kolledjderdiń dırektorlarymen kezdesti.
Kezdesý barysynda QMDB Tóraǵasy Tóralqa májilisindegi baǵdarlyq baıandamasynda aıtylǵan dinı bilim jáne kadr daıarlaýǵa qatysty mindetterdi tilge tıek etti. Sondaı-aq dinı maman daıyndaýdaǵy ustazdardyń qajyrly eńbegine alǵysyn bildirdi.
«Qazaqstan musylmandary dinı basqarmasyna qarasty medrese jumysy 2007 jyldan bastap qolǵa alyndy. Osy jyldary elimizde medreseler ashylyp, 2010 jyly alǵashqy túlekter shyqty. Búginde elimizdegi 9 medrese kolledj mártebesin ıelenip, túlekterge memlekettik úlgidegi dıplomdar berilýde. On alty jyl ishinde 3134 shákirt medreseden bilim alsa, sonyń 2405-i ul, 729-y qyz balalar. Dinı basqarma medrese túlekteriniń turaqty jumyspen qamtylýyna jáne bilim jolyn jalǵastyrýǵa nıetti shákirtterge de udaıy kómektesip keledi» dep atap ótti Bas múftı Naýryzbaı qajy Taǵanuly.
Jıyn barysynda QMDB Tóraǵasy medreselerde oqytylatyn pánder men oqýlyqtar zaman talabyna saı bolýy qajettigin, sondaı-aq babalar mektebin de jalǵastyryp, klassıkalyq eńbekterdiń, Orta Azııa medreselerinde qoldanylǵan tanymal kitaptardyń oqytylýyna basymdyq berý kerektigin aıtty. Sondaı-aq Dinı bilim jáne kadr daıarlaý bóliminiń meńgerýshisi Smaıyl Seıtbekov qazirgi tańda medrese-kolledjderde oqytylyp jatqan kitaptardy tanystyryp ótti.
Aıta keteıik, kúni keshe ótken Tóralqa májilisinde Bas múftı Naýryzbaı qajy Taǵanuly medrese-kolledjderdiń oqý baǵdarlamasyna fakýltatıv dáris retinde «Alashtaný», «Tulǵataný» pánin engizý týraly sheshim qabyldaǵanyn atap ótken bolatyn.
