BAS MÚFTI MEDRESE ShÁKIRTTERIN BILIM KÚNIMEN QUTTYQTADY

Búgin elordadaǵy «Astana» medrese-kolledjine arnaıy barǵan QMDB Tóraǵasy, Bas múftı Naýryzbaı qajy Taǵanuly ustazdar men shákirtterdi bilim kúnimen quttyqtap, bilim alýdyń mańyzy jaıynda nasıhatyn jetkizdi. 

«Astana medrese-kolledji – dinı bilim men zamanaýı bilimdi ushtastyryp otyrǵan oqý oryndarynyń biri. Munda sizder Quran Kárim men hadıs ilimin, ıslam senimi men ǵıbadatyn, ıslam ádebin, daǵýat ádistemesin, sopylyq ilimdi, Qazaqstandaǵy dinder men dinı aǵymdardy oqısyzdar. Sonymen qatar Alashtaný, Abaıtaný, mádenıettaný, fılosofııa, áleýmettaný, saıasattaný, Ekonomıka, kásipkerlik, menedjment jáne psıhologııa sııaqty zaıyrly pánderdi meńgeresizder.

Bul pánderdiń barlyǵynyń túpki maqsaty – bilimi tereń, oıy sergek, tárbıesi kórkem, elin súıetin, dinin durys túsinetin tulǵa qalyptastyrý.

Búgingi zaman mamannan tek dinı bilimdi ǵana emes, birneshe til bilýdi, aqparattyq tehnologııalardy meńgerýdi, synı oılaýdy, derekterdi taldaı bilýdi jáne qoǵammen durys qarym-qatynas jasaýdy talap etedi.

Sondyqtan arab tilin meńgerýge, qazaq jáne orys tilderinde saýatty sóıleýge, qajet bolǵan jaǵdaıda shet tilderin úırenýge talpynyńyzdar. Zamanaýı tehnologııany ıgerip, paıdaly aqparatty durys saralaı bilýdi úırenińizder.

Quran – júrekke baǵyt, ómirge baǵdar

Qurmetti shákirtter! Sizderdiń basty erekshelikterińiz – Quran Kárimmen etene baılanysta bolýlaryńyz. Qurandy oqý – úlken mártebe. Biraq Qurandy jattaý men durys oqý jetkiliksiz. Onyń maǵynasyn túsinip, aıattardyń ónegesin ómirde qoldaný mańyzdy. Tájýıd erejelerin úırenip, Qurandy durys ári kórkem oqýǵa mán berińizder. Quran qıssalarynan ǵıbrat alyp, hadısterdiń mánin túsinip, alǵan bilimderińizdi minez-qulyqtaryńyzben kórsetińizder»,- dedi Bas múftı.

Sondaı-aq, Bas múftı Naýryzbaı qajy Taǵanuly medrese ustazdarymen kezdesip, olardyń áleýmettik jaǵdaıy men bıylǵy oqý jylyna daıyndyǵy, bilim baǵdarlamasy jaıynda sóılesti.

Источник: Aisha