Bas múftı qarı qyzdarǵa sáttilik tiledi (FOTO)
Elordada Qazaqstan musylmandary dinı basqarmasynyń uıymdastyrýymen qyzdar arasynda ótip jatqan Quran Kárimdi jatqa oqýdan II respýblıkalyq baıqaýda Bas múftı Naýryzbaı qajy Taǵanuly quttyqtaý sóz sóılep, qatysýshylarǵa sáttilik tiledi.
QMDB Tóraǵasy Quran oqýdyń mańyzy men qos dúnıedegi artyqshylyǵyna toqtaldy. Sondaı-aq Quran jattaǵan qarılardyń dárejesin tilge tıek etti.
«Qurandy jattaý – Allanyń razylyǵyn alatyn jáne aqyrette saýapqa keneltetin qulshylyq. Árıne Quran jattaýdy osyndaı nıetpen jattasa ǵana saýapqa kenelmek. Dúnıelik bir paıda úshin Quran jattaý durys emes.
Sharıǵatymyzda Qurandy úırenip, ózgelerge úıretken adam eń jaqsy adam bolmaq. Paıǵambarymyz (oǵan Allanyń salaýaty men sálemi bolsyn) bir hadısinde:
«Senderdiń eń jaqsylaryń – Qurandy úırenip ony úıretkenderiń» dese, endi bir ósıetinde: «Keýdesinde Qurannan esh nárse bolmaǵan adam qańyrap turǵan úıge uqsaıdy» deıdi. Sondaı-aq Alla elshisi (oǵan Allanyń salaýaty men sálemi bolsyn) jumaqta qarılarmen birge bolatynyn súıinshilegen.
Alla Taǵala qarı qyzdarymyzǵa qos dúnıeniń jaqsylyǵyn, aqyrette jánnattyń tórin násip etkeı! Qyzdar arasyndaǵy qarılar baıqaýynyń joǵary deńgeıde ótýine tilektespin. Qatysýshylarymyzǵa Alla jar bolsyn» dedi Bas múftı.
Eske sala keteıik, buǵan deıin elordada Qazaqstan musylmandary dinı basqarmasynyń uıymdastyrýymen qyzdar arasynda Quran Kárimdi jatqa oqýdan II respýblıkalyq baıqaý bastalǵanyn habarlaǵan bolatynbyz.
