BAS MÚFTI QARILARǴA IJAZA KÝÁLIGIN TABYSTADY (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Hýsamýddın as-Syǵanaqı atyndaǵy ıslam ınstıtýtynyń Astana qalasyndaǵy «Ijaza» ortalyǵynda bilim alǵan alǵashqy túlekterine «Quran ıjazasy» kýáligin tabystaý rásimine qatysty.
Elordadaǵy Respýblıkalyq bas meshitte ótken ıgi is-sharada Bas múftı: «Bul – dinı salada jetken tuńǵysh jetistigimiz, ıslamdyq bilim berýdiń mańyzdy kezeńi. Osynaý tarıhı sáttiń kýási bolýdy siz ben bizge násip etken Alla Taǵalaǵa sansyz maqtaý-madaq bolsyn.
«Quran ıjazasy» – tizbegi ardaqty Paıǵambarymyz Muhammedten (oǵan Allanyń salaýaty men sálemi bolsyn) bastaý alatyn qarılarymyzdyń erejege sáıkes Qurandy oqýy men tolyq este saqtaýyn kýálandyratyn qujat. Qarılarymyzǵa alǵan bilimi eki dúnıede de dárejelerin kóterip, jattaǵan Quranyn árdaıym este saqtap júrgeı degen tilegimiz bar. Sondaı-aq osy ınstıtýttyń jumysyn júıeli túrde júrgizip kele jatqan Baǵdat Manabaev baýyrymyzǵa, qarılarymyzdyń ıjaza alýyna kóp eńbektengen mysyrlyq hafız, doktor Mahmýd Hasan Mahmýd Muhammedke jáne shákirtterge quran dáristerin úıretken tanymal qarı Temirjan Ótejanulyna alǵysymdy bildiremin» dedi.
QMDB Tóraǵasy qarılarǵa jyl boıy dáris bergen eki ustazǵa alǵys hat tabystap, syı-sııapat jasady.
Aıta keteıik, Hýsamýddın as-Syǵanaqı atyndaǵy ıslam ınstıtýtynyń Astanadaǵy «Ijaza» bóliminde alǵash ret tálim alǵan 14 shákirt doktor Mahmýd Hasan Mahmýd Muhammedten Asym qyraǵatynyń hafs rıýaıatyna saı shatabııa joly boıynsha ıjaza kýáligin aldy. Al buǵan deıin «Ijaza» ortalyǵynyń Almaty qalasyndaǵy bóliminde 18 qarı atalmysh kýáliktiń ıegeri atanǵan bolatyn.
